Beynəlxalq Qırmızı Xaç Komitəsinin (BQXK) ölkəmizdəki nümayəndəliyi və Respublika Daxili İşlər Nazirliyi Bakı şəhərində Daxili Qoşunların və polis qüvvələrinin zabitləri üçün seminar keçirmişdir.

Nümayəndəlikdən AZƏRTAC-a bildirmişlər ki, seminarda təhsil, təlim və əməliyyat şöbələrinin zabitlərinə beynəlxalq humanitar hüquq, beynəlxalq insan hüquqları və BQXK-nin fəaliyyəti barədə məlumat verilmişdir. BQXK-nin silahlı qüvvələr və polis qüvvələri üzrə ekspertləri, döyüş əməliyyatlarının aparılması, komandirin məsuliyyəti, hüquq mühafizəsi, ictimai asayişin qorunması mövzularına da toxunmuşlar.