İQTİSADİYYAT


“Bakcell” Dağlıq Qarabağda qanunsuz fəaliyyətə etiraz edib

Bakı, 6 iyul, AZƏRTAC

Azərbaycanın ilk mobil operatoru və aparıcı mobil internet provayderi “Bakcell” şirkəti Birləşmiş Ərəb Əmirliklərinin (BƏƏ) mobil operatoru “Etisalat”la Azərbaycanın Ermənistan tərəfindən işğal olunmuş ərazilərində qeyri-qanuni fəaliyyət göstərən “Karabakh Telecom” arasında rouminq razılaşmasının ləğvindən məmnunluğunu ifadə edib.

“Bakcell”dən AZƏRTAC-a bildirilib ki, şirkətin uzunmüddətli rouminq partnyoru olan “Etisalat”ın “Karabakh Telecom”la əməkdaşlığa başlaması ilk günlərdən “Bakcell” şirkətini narahat edib. Bununla bağlı şirkət rəhbərliyi tərəfindən dəfələrlə “Etisalat”a rəsmi məktubla müraciət edilib. Məktublarda qeyd olunub ki, Dağlıq Qarabağ Azərbaycan Respublikasının ayrılmaz hissəsidir və bu fakt beynəlxalq səviyyədə tanınır.

Azərbaycan Respublikasının işğal olunmuş ərazilərində qanunsuz fəaliyyət göstərən “Karabakh Telecom” şirkəti ilə əməkdaşlıq “Etisalat” şirkətinin beynəlxalq nüfuzuna böyük zərbədir və bu əməkdaşlıqdan əldə olunan gəlirlər qeyri-qanuni rejimin fəaliyyətinin maliyyələşdirilməsi üçün istifadə olunur.

“Etisalat” mobil operatoru isə öz növbəsində “Karabakh Telecom”la əməkdaşlığını məhz “Karabakh Telecom”un Ermənistanda rəsmi qeydiyyatının olması ilə əsaslandırırdı. Lakin “Bakcell” qəti mövqe ortaya qoyaraq bildirib ki, “Etisalat” və “Karabakh Telecom”un əməkdaşlığının davam etməsi “Bakcell” ilə “Etisalat” arasındakı biznes münasibətlərinin birtərəfli şəkildə dayandırılması ilə nəticələnəcək.

“Bakcell” şirkəti Azərbaycan Respublikası Xarici İşlər Nazirliyinin bu istiqamətdə atdığı addımları yüksək dəyərləndirir və problemin həllində göstərdiyi səylərə görə dərin təşəkkürünü bildirir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.