CƏMİYYƏT


Bakı, Sumqayıt, Gəncə və Xaçmazda fitosanitar monitorinqlər keçirilib

Bakı, 12 may, AZƏRTAC

Qida Təhlükəsizliyi Agentliyi respublika üzrə fitosanitar vəziyyətin qiymətləndirilməsi istiqamətində mütəmadi olaraq monitorinqlər aparır. Bu sahədə Agentliyin əməkdaşları müvafiq qurumların mütəxəssisləri ilə birlikdə Bakı, Sumqayıt, Gəncə, Xaçmazda yerləşən kənd təsərrüfatı sahələri, o cümlədən parklar, bağlar və yaşıllıqlarda baxış keçiriblər.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, fitosanitar monitorinq nəticəsində dekorativ ağac, kol və gül bitkilərinin mövcud vəziyyəti yerində təhlil edilib, bitki və bitkiçilik məhsullarına ziyan verən zərərli orqanizmlərlə zəif sirayətlənmə müşahidə olunub. Aşkar edilmiş uyğunsuzluqlarla əlaqədar müvafiq aqrokimyəvi və aqrotexniki tədbirlərin həyata keçirilməsi üçün sahə aqronomuna, həmçinin müvafiq qurumlara məlumat verilib.

Bununla yanaşı, pomidor istixanalarında da monitorinqlər aparılıb. İstixanadakı mövcud bitkilərdən nümunələr götürülərək Qida Təhlükəsizliyi İnstitutunun müvafiq laboratoriyalarına təqdim olunub. Həmçinin istixana rəhbərliyinə mütəmadi olaraq aqrokimyəvi və aqrotexniki tədbirlərin keçirilməsi, zərərverici ilə sirayətlənmə hallarının minimuma endirilməsi ilə əlaqədar tövsiyələr verilib.

Qeyd edək ki, qida təhlükəsizliyinin təmin olunmasında müstəsna əhəmiyyətə malik bitki sağlamlığının qorunması, eyni zamanda, xəstəliklərin, zərərvericilərin vaxtında aşkarlanaraq, onlara qarşı səmərəli mübarizə tədbirlərinin görülməsi məqsədilə son illər bir sıra ciddi işlər görülüb. Nəzarət tədbirləri çərçivəsində ölkəmizə başqa ölkələrdən karantin tətbiq edilən zərərli orqanizmlərin daxil olması və yayılmasının qarşısının alınması, eləcə də respublika ərazisində fitosanitar sabitliyin təmin edilməsi üçün mütəmadi fitosanitar monitorinqlərin aparılması və laborator müayinələrin həyata keçirilməsi mühüm əhəmiyyət kəsb edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.