Balakəndə keçmiş məhkum qaçırdığı avtomobillə qəza törədib

Bakı, 9 iyul, AZƏRTAC 

Balakən Rayon Polis Şöbəsinə iyulun 8-də saat 6 radələrində Qabaqçöl qəsəbəsi ərazisindən Qullar kənd sakini N.Osmanovun “Mercedes” markalı avtomobilinin qaçırılması barədə məlumat daxil olub.

Daxili İşlər Nazirliyinin mətbuat xidmətindən AZƏRTAC-a bildiriblər ki, dərhal başlanmış əməliyyat-axtarış tədbirləri nəticəsində avtomobil həmin gün qeyd edilən kəndin ərazisində divara vurulmuş vəziyyətdə tapılıb.

Davam etdirilən tədbirlərlə nəqliyyat vasitəsini qaçırmaqda şübhəli bilinən Balakən şəhər sakini, əvvəllər məhkum olunmuş A.Qarayev polis əməkdaşları tərəfindən saxlanılıb.

Faktla əlaqədar cinayət işi başlanıb, araşdırma aparılır.