Biləsuvar, 7 yanvar, İsmayıl Cəfərli, AZƏRTAC

Bölgələrdə taxıl sahələrinin əsas fitosanitar müşahidə və mübarizə tədbirlərinə başlanılıb. Biləsuvarda da Bitki Mühafizə Mərkəzinin mütəxəssisləri tərəfindən bu il 10 min hektardan artıq sahədə gəmiricilərə və çəyirtkəkimilərə qarşı mübarizə tədbirlərinin aparılması proqnozlaşdırılıb.

AZƏRTAC xəbər verir ki, hər il Biləsuvar rayonunda 30 min hektardan çox sahədə dənli bitkilər əkilir. Bu il də fermerlər payızlıq əkin olaraq 20 min hektar buğda, 14 min hektara yaxın arpa bitkisinin əkinini həyata keçiriblər. Erkən səpin aparılan sahələrdə artıq 100 faiz çıxış əldə olunub.

Hazırda Respublika Bitki Mühafizə Mərkəzinin yerli mütəxəssisləri tərəfindən taxıl sahələrinin əsas zərərvericilərindən olan siçanabənzər gəmiricilərə və taxıl böcəyinə qarşı fitosanitar müşahidələr və mübarizə tədbirləri ilə bağlı monitorinqlərə başlanılıb. Mütəxəssislər tərəfindən, ümumilikdə, ötən il büdcə vəsaiti hesabına 15 min hektardan artıq sahədə siçanabənzər gəmiricilərə, 1450 hektar sahədə isə çəyirtkəkimilərə qarşı müşahidə və mübarizə tədbirləri aparılıb.

Biləsuvar Bitki Mühafizə Mərkəzinin rəhbəri Yusif Vəliyev bildirib ki, mərkəzin mütəxəssisləri sahələrdə siçanabənzər gəmiricilərə qarşı müşahidə və mübarizə işinin təşkilində fəal iştirak edirlər. Dövlət tərəfindən təzə çiləyicilər, yeni texnikalar verilib: “Hazırda həmin sahələrdə demək olar ki, müntəzəm şəkildə yoxlamalar nəticəsində siçanabənzər gəmiricilər yoxdur. Gəmiricilər olarsa, biz yeni texnikalarla həmin sahələrdə dərmanlama işləri aparacağıq”.

Mütəxəssislərin sözlərinə görə, taxıl əkinindən sonra havanın isti və quraq olması gəmiricilərin sayını artırır. Rayonun taxıl sahələrinin əksəriyyəti suvarılan ərazilərdə yerləşdiyindən bu hallara kütləvi rast gəlinmir.

Aqronom Mirzəxan İbayev deyib: “Apardığımız müşahidələr zamanı gəmiricilərin sayı çox olarsa, dərhal həmin ərazilərdə dərmanlama işləri aparırıq. Bunun üçün biz fermerlərlə tövsiyə verir, onları dərmanla təmin edirik. Sink-fosfiddən çox istifadə etmişik, siçanabənzər gəmiricilərdə istifadə olunur. Bu il yenə də anbarda dərmanlarımız var, İdarəmiz tərəfindən lazım olan bütün dərmanlarla təmin olunuruq”.

Fermer Yalçın Abışov isə qeyd edib ki, ötən il 10 hektar sahədə əkin aparmışdı və bitkinin yarpaqlarında saralma olurdu. “Ona pas xəstəliyi deyirlər. Həmin vaxt Bitki Mühafizə Mərkəzinə müraciət etdik, dərhal mütəxəssis göndərdilər. Gəlib baxdılar, həmin xəstəliyə qarşı vaxtında dərmanlama aparıldı. Bu il elə də ziyanlıq görməmişəm. Əgər belə hal olarsa, əminəm ki, onun da qarşısı dərhal alınacaq”.

Qeyd edək ki, 2022-ci ilin yanvar-fevral aylarında 4 min hektardan artıq sahədə siçanabənzər gəmiricilərə, 6 min hektar sahədə isə çəyirtkəkimilərə qarşı müşahidə və mübarizə tədbirlərinin görüləcəyi proqnozlaşdırılıb.