Bakı, 7 iyun, AZƏRTAC

İyunun 7-də Hərbi Qənimətlər Parkında Təhsil Nazirliyi tərəfindən ümumtəhsil məktəblərinin şagirdləri və məktəbdənkənar təhsil müəssisələrinin dərnək üzvləri arasında təşkil olunmuş “Biz zəfər qazandıq!” respublika onlayn rəsm müsabiqə-sərgisinin qaliblərinin mükafatlandırılması mərasimi keçirilib.

AZƏRTAC xəbər verir ki, öncə tədbir iştirakçıları müsabiqəyə təqdim edilmiş rəsm işləri ilə tanış olublar.

Mərasim Azərbaycan Respublikasının Dövlət himninin səsləndirilməsi ilə başlanıb.

Tədbiri açan təhsil nazirinin müavini Firudin Qurbanov müsabiqənin əhəmiyyətindən danışıb. Bildirib ki, istedadlı uşaq və gənclərin aşkar edilməsində, böyüməkdə olan gənc nəsildə vətənə, torpağa məhəbbət hisslərinin artırılmasında və hərbi-vətənpərvərlik ruhunun təbliğində belə müsabiqələrin rolu böyükdür. Vətən müharibəsində qazanılan zəfərin bütün türk dünyasının qələbəsi olduğunun gənc nəslə çatdırılması, uşaq və gənclərin yaradıcılıq qabiliyyətlərinin inkişaf etdirilməsi və asudə vaxtlarının səmərəli təşkili baxımından belə müsabiqələr xüsusi əhəmiyyət daşıyır.

Nazir müavini Azərbaycan xalqının çoxəsrlik tarixinin şərəfli mərhələsini yaşadığını, bütün dünya azərbaycanlılarının qürur və sevinc hissləri keçirdiyini qeyd edərək, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli ordumuzun 2020-ci il sentyabrın 27-dən başladığı əks-hücum əməliyyatları nəticəsində Qarabağı Ermənistanın işğalından azad etməklə milli çağdaş tarixinə şanlı səhifə yazdığını tədbir iştirakçılarının diqqətinə çatdırıb. Firudin Qurbanov qeyd edib ki, Müzəffər Ali Baş Komandan İlham Əliyev tərəfindən təsdiqlənən mükəmməl hərbi strategiya və taktika döyüş meydanında Azərbaycan Ordusunun “Dəmir yumruq” əməliyyatını sürətlə və az itki ilə həyata keçirməyə imkan verdi. Nəticədə, düşmən tərəfinin 30 il ərzində möhkəmləndirdiyi müdafiə xətləri yarıldı, hərbi resursları məhv edildi. Düşmənin canlı qüvvələri isə, sözün həqiqi mənasında, mövqelərini qoyub qaçdılar. Ermənilərin qoyub qaçdığı atıcı silahlar, ağır texnikalar, raket kompleksləri, hərbi nəqliyyatlar və digər sursatlar qənimətlər sırasındadır.

Firudin Qurbanov əlavə edib ki, Zəfər paradının ən yaddaqalan və rəmzi kompozisiyalardan biri - Azərbaycan Silahlı Qüvvələrinin işğaldan azad olunan torpaqlarda düşməndən qənimət götürdüyü 2000-dən çox avtomobilin nömrə nişanından hazırlanan lövhə də parkın ərazisindədir. Hərbi Qənimətlər Parkı tarixi Zəfərin nümayişi baxımından xüsusi əhəmiyyət kəsb edir. Burada təqdim edilən eksponatlar Azərbaycana Zəfər qazandıran döyüşləri bir daha göz önündə canlandırmağa imkan verir.

Nazir müavini qeyd edib ki, gənclərimizin vətənpərvərlik ruhunda tərbiyə olunması ən vacib məsələlərdən biridir. İkinci Qarabağ müharibəsi göstərdi ki, bu sahədə də böyük uğurlar əldə edilib. 44 günlük Vətən müharibəsi bizim gücümüzü, iradəmizi, birliyimizi göstərdi. Göstərdi ki, heç vaxt Azərbaycan xalqı bu vəziyyətlə barışmayacaq. İkinci Qarabağ müharibəsi bizim şanlı tariximizdir. Biz müzəffər xalq kimi özümüzü dünyada təsdiq etmişik.

Firudin Qurbanov çıxışının sonunda qalibləri təbrik edib, onlara uğurlar arzulayıb.

Azərbaycan Rəssamlar İttifaqının sədri, Xalq rəssamı Fərhad Xəlilov və Azərbaycan Dövlət Rəssamlıq Akademiyasının prorektoru, Xalq rəssamı Səlhab Məmmədov Vətən müharibəsində Müzəffər Ali Baş Komandan İlham Əliyevin rəhbərliyi ilə ordumuzun göstərdiyi şücaətdən bəhs ediblər. Mükafatlandırma mərasiminin Hərbi Qənimətlər Parkında keçirilməsinin xüsusi önəmini vurğulayıblar, qalibləri təbrik ediblər.

Çıxışlardan sonra müsabiqə-sərgidə 1, 2, 3-cü və həvəsləndirici yerlərə layiq görülmüş məktəblilər təltif olunub, onlara diplom və hədiyyələr təqdim edilib.

Qeyd edək ki, 3 yaş (6-9, 10-13, 14-17) qrupu üzrə keçirilən müsabiqə-sərgiyə ümumilikdə 1127 rəsm işi daxil olub. İşlər Azərbaycan Dövlət Rəssamlıq Akademiyasının professorları Ziyadxan Əliyev, Məmmədhüseyn Hüseynov və Azərbaycan Rəssamlar İttifaqının üzvü İnna Viktorovna Bəşirova tərəfindən qiymətləndirilib.