İDMAN
Bu gün Azərbaycan Premyer Liqasının XII turuna start verilir
Bakı, 17 noyabr, AZƏRTAC
Bu gün futbol üzrə Azərbaycan Premyer Liqasının XII turuna start verilir.
AZƏRTAC xəbər verir ki, üç günü əhatə edəcək turun açılış matçında - “Qarabağ” klubu Bakı Olimpiya Stadionunda “Sumqayıt”ı qəbul edəcək. Bu görüş Bakı Olimpiya Stadionunda keçirilən ilk Premyer Liqa oyunu olacaq.
Turun ikinci günündə “Keşlə” klubu “Zirə” ilə qarşılaşacaq. Günün digər oyununda isə “Səbail” səfərdə “Kəpəz”in qonağı olacaq.
Noyabrın 19-da isə “Neftçi” və “Qəbələ” klubları üz-üzə gələcəklər.
Qeyd edək ki, turnir cədvəlinə 25 xalla “Qarabağ” başçılıq edir. “Zirə” klubu 24 xalla ikinci pillədədir. İlk üçlükdə isə 22 xalla “Qəbələ” qərarlaşıb. Digər pillələrdə müvafiq olaraq “Sumqayıt” (16), “Neftçi” (13 xal), “Səbail” (9), “Keşlə” (8) və “Kəpəz” (7) yer alıblar.