İQTİSADİYYAT
Cari ilin yanvar-noyabr aylarında sənayedə 30,8 milyard manatlıq məhsul istehsal olunmuşdur
Bakı, 14 dekabr (AZƏRTAC). Azərbaycanın sənaye sahələrində 2013-cü ilin yanvar-noyabr aylarında 30,8 milyard manatlıq məhsul istehsal olunmuş, xidmətlər göstərilmişdir.
Dövlət Statistika Komitəsindən AZƏRTAC-a bildirmişlər ki, bu müddətdə sənayenin qeyri-neft sahələrində 3,2 faizlik, neft sektorunda isə 1,3 faizlik artım müşahidə olunmuşdur. İstehsalın dörddə üç hissəsi mədənçıxarma, 20,1 faizi emal, 5,1 faizi elektrik enerjisi, qaz və buxar istehsalı, bölüşdürülməsi və təchizatı, 0,6 faizi isə su təchizatı, tullantıların təmizlənməsi və emalı bölmələrində həyata keçirilmişdir.
On bir ayda 39,5 milyon ton neft, 16,2 milyard kubmetr əmtəəlik təbii qaz hasil edilmişdir. Qeyri-neft bölməsində qida, içki, dəri və dəri məmulatları, ayaqqabıların, poliqrafiya, kimya, əczaçılıq məhsulları, tikinti materialları, maşın və avadanlıqlar, avtomobil və qoşqular, digər nəqliyyat vasitələri istehsalında daha çox artım əldə olunmuşdur.