REGİONLAR
DÖVLƏT QAYĞISI AQRAR SAHƏNİN İNKİŞAFINI SÜRƏTLƏNDİRMƏK ÜÇÜN YENİ İMKANLAR AÇMIŞDIR
BU FİKİR KƏND TƏSƏRRÜFATI NAZİRİ İ.ABASOVUN QUBADA KEÇİRDİYİ ZONA MÜŞAVİRƏSİNDƏ XÜSUSİ VURĞULANMIŞDIR
Qubada “Toxumçuluq və tinglik təsərrüfatlarından satılan 1-ci və 2-ci reproduksiyalı toxumlara və tinglərə görə dövlət büdcəsindən təsərrüfatlara subsidiyanın ödənilməsi Qaydası”nın təsdiq edilməsi barədə” Nazirlər Kabinetinin 2007-ci il 25 iyun tarixli qərarının icrası ilə əlaqədar zona müşavirəsi keçirilmişdir.
Rayon icra hakimiyyəti başçısı aparatının şöbə müdiri Şalbuz Qurbanov AZƏRTAC-a bildirmişdir ki, müşavirədə kənd təsərrüfatı naziri İsmət Abasov, Quba, Qusar, Xaçmaz, Dəvəçi, Siyəzən və Xızı rayonları icra hakimiyyəti başçılarının müavinləri, bələdiyyə sədrləri, fermerlər və kənd təsərrüfatı mütəxəssisləri iştirak etmişlər.
Quba rayon icra hakimiyyəti başçısının birinci müavini Həsən Əhmədov müşavirəni açaraq, müzakirə olunan məsələnin əhəmiyyətini vurğulamışdır.
Kənd təsərrüfatı naziri İsmət Abasov çıxış edərək, Nazirlər Kabinetinin müvafiq qərarı ilə əlaqədar geniş məlumat vermişdir. Nazir demişdir ki, kənd təsərrüfatında aparılan aqrar islahatlar nəticəsində respublika üzrə pay torpağı almaq hüququ olan 3 milyon 400 min nəfərə yaxın vətəndaşa ümumilikdə 1 milyon 393 min hektar torpaq sahəsi paylanmışdır. Ümummilli lider Heydər Əliyevin diqqət və qayğısı nəticəsində kənd təsərrüfatı məhsulları istehsalçılarının bütün növ vergilərdən azad olunması aqrar sahənin inkişafına böyük təkan vermişdir. Həyata keçirilən aqrar islahatlar kənd təsərrüfatında dinamik inkişafla nəticələnmişdir.
Aqrar sahənin inkişafına təkan verən ən vacib amillərdən birinin məhz Azərbaycan Prezidenti İlham Əliyevin “Aqrar bölmədə lizinqin genişləndirilməsi sahəsində əlavə tədbirlər haqqında” 2004-cü il 23 oktyabr tarixli Sərəncamı ilə yaradılmış “Aqrolizinq” Açıq Səhmdar Cəmiyyəti olduğunu qeyd edən nazir, kənd təsərrüfatı məhsulları istehsalçılarını yeni, müasir texnika və mineral gübrələrlə təmin etmək məqsədilə 2005-2007-ci illərdə Səhmdar Cəmiyyətinə dövlət büdcəsindən 115 milyon manat vəsait ayrıldığını bildirmişdir. İndiyədək “Aqrolizinq” ASC-nin xətti ilə olkəmizə 1000-ə yaxın traktor, 600-ə yaxın kombayn və digər kənd təsərrüfatı texnikası, habelə mineral gübrə gətirilmiş və fermerlərə verilmişdir.
Nazir Azərbaycan Prezidentinin “Kənd təsərrüfatı məhsulları istehsalçılarına dövlət dəstəyi haqqında” 2007-ci il 23 yanvar tarixli Sərəncamının icrası ilə əlaqədar görülmüş işlər barədə də məlumat vermiş, artıq bir neçə rayonda fermerlərə yardımların verilməsinə başlanıldığını nəzərə çatdırmışdır.
Məruzəçi daha sonra müşavirə iştirakçılarına Nazirlər Kabinetinin “Toxumçuluq və tinglik təsərrüfatlarından satılan 1-ci və 2-ci reproduksiyalı toxumlara və tinglərə görə dövlət büdcəsindən təsərrüfatlara subsidiyanın ödənilməsi Qaydası”nın təsdiq edilməsi barədə” 2007-ci il 25 iyun tarixli qərarının icra mexanizmi, subsidiyaların verilməsi qaydaları və şərtləri, sənədlərin tərtibi və həlli vacib olan digər məsələlər barədə məlumat vermişdir.
Bildirilmişdir ki, dövlət büdcəsindən təsərrüfatlara subsidiyanın ödənilməsi üçün daxil olmuş müraciətləri araşdırmaq məqsədilə yerlərdə rayon komissiyaları, habelə bu komissiyaların təqdimatı əsasında ayrı-ayrı ərazilər üzrə mütəxəssislərdən ibarət işçi qrupları yaradılmalıdır.
Məruzəçi daha sonra müşavirə iştirakçılarını bəzi məhsullar üzrə subsidiyanın ödənilmə məbləği və həddi ilə tanış etmişdir.
İ.Abasov Nazirlər Kabinetinin müvafiq qərarında qeyd olunan digər məsələlərə də toxunmuş, sənədlərin tərtibi ilə bağlı metodiki tövsiyələrini bildirmişdir.
Sonra rayonların icra hakimiyyətlərinin nümayəndələri, mütəxəssislər, fermerlər, toxumçuluq və tingçilik təsərrüfatlarının rəhbərləri çıxış etmiş, arzu və təkliflərini bildirmişlər.
Sonda müşavirə iştirakçılarının sualları cavablandırılmışdır.