Bakı, 14 sentyabr, AZƏRTAC

Qonşu dövlətlərin əraziləri hesabına “böyük Ermənistan” yaratmaq iddiasından hələ də əl çəkməyən mənfur ermənilər məkrli niyyətlərini davam etdirirlər. Dünya birliyinin bu ədalətsizliyə göz yumması və ikili standartlar işğalçı ölkəni getdikcə quduzlaşdırır. Ermənistan zəbt etdiyi Azərbaycan torpaqlarından geri çəkilmək əvəzinə, təxribatçı addımlarını daha da intensivləşdirib. Hər addımbaşı beynəlxalq hüququn norma və prinsiplərinə hörmətsizlik edən Ermənistan dövləti sərhədboyu ərazilərdə təxribatları davam etdirir, atəşkəs rejimini pozur, dinc əhalini qətlə yetirir, yaşayış məntəqələrinə ciddi ziyan vurur. Mənfur düşmənin iyulun 12-də Tovuz istiqamətində dövlət sərhədini pozmağa cəhd etməsi, baş nazir Nikol Paşinyanın və onun arvadı Anna Akopyanın Dağlıq Qarabağa səfərləri və işğal ərazisində şou göstərmələri münaqişəni daha da alovlandırır.

Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov deyib.

K.Seyidov bildirib ki, ümumiyyətlə, Nikol Paşinyan Ermənistanın baş naziri “seçiləndən” sonra bu ölkədə işğal siyasəti daha da gücləndirilib, sərhədboyu ərazilərdə təxribatlar davam etdirilib. Son iki ildə Ermənistan-Azərbaycan, Dağlıq Qarabağ münaqişəsinin tənzimlənməsi istiqamətində aparılan danışıqlar prosesi tamamilə dayandırılıb, müharibə qığılcımları daha da artıb. Bu da Paşinyanın faşizm ideologiyasına hüsn-rəğbətindən irəli gəlir. Hətta işğalçı ölkənin rəsmiləri də etiraf edirlər ki, Ermənistan münaqişənin sülh yolu ilə həllində maraqlı deyil. Tovuz hadisələrindən sonra Ermənistanın genişmiqyaslı silahlanması da təcavüzkar ölkənin yeni məkrli planlarından xəbər verir. Paşinyanın Azərbaycanın işğal edilmiş Dağlıq Qarabağ bölgəsinə səfərləri zamanı hərbi obyektlərə baş çəkməsi, oradakı vəziyyətlə maraqlanması Ermənistanın işğalçı ölkə olduğunu və bu məkrli siyasətdən əl çəkmədiyini bir daha təsdiqləyir.

Partiya sədri qeyd edib ki, işğal olunmuş Azərbaycan ərazilərinə Suriya və Livan ermənilərinin məqsədyönlü şəkildə köçürülməsi Ermənistan rəhbərliyinin işğal siyasətindən əl çəkmədiyindən xəbər verir. Bu, həm də təcavüzkar ölkənin Azərbaycana qarşı törətdiyi cinayətlərdən biridir. Bu addımlar regionda demoqrafik nisbətin dəyişməsinə yönəlib və buna görə də hərbi cinayət sayılmalıdır. Zaman-zaman işğal altında olan ərazilərimizdə qeyri-qanuni məskunlaşdırılmaya dair faktlar mövcuddur. Ermənistan tərəfindən həyata keçirilən qanunsuz məskunlaşdırma faktı ATƏT-in faktaraşdırıcı missiyasının hesabatlarında da öz əksini tapıb.

Təbii ki, işğal edilmiş ərazilərimizdə qanunsuz məskunlaşma prosesi Ermənistanın dövlət orqanlarının təşəbbüsü ilə həyata keçirilir. Qondarma rejimin başçısı Araik Arutunyan Livanda yerləşən Kilikiya katolikosluğunun rəhbəri, diaspor ermənilərinin dini lideri I Aramla danışıq əsnasında Dağlıq Qarabağın Livandan 100-150 erməni ailəsini qəbul etməyə hazır olduğunu bildirib. Həmçinin müzakirə zamanı erməni ailələrinə qondarma rejim tərəfindən dəstək proqramlarının həyata keçirilməsi barədə də fikir mübadiləsi aparılıb. Bununla da Ermənistan Dağlıq Qarabağ məsələsində status-kvonu qoruyub saxlamağa çalışır. Təəssüf ki, beynəlxalq təşkilatlar, xüsusilə münaqişənin nizamlanmasında vasitəçilik missiyasını üzərinə götürmüş, lakin bu istiqamətdə heç bir nəzərəçarpan iş görməyən ATƏT-in Minsk qrupu beynəlxalq və regional təşkilatlar işğal altında olan Azərbaycan ərazilərində qanunsuz məskunlaşma prosesinə siyasi qiymət verməyiblər. Əks halda, başqa ölkələr də bu siyasətin qurbanına çevrilə bilərlər. Rusiyanın aparıcı kütləvi informasiya vasitəsi olan “Nezavisimaya qazeta” da Paşinyanın bu addımlarını Ermənistanın hərbi əməliyyatların bərpası üçün yeni təxribatlara əl atacağı ilə əlaqələndirib.

Artıq Suriya ermənilərindən sonra Livanda yaşayan ermənilər də Dağlıq Qarabağa köçürülməkdədir. Ermənistanın bu əməlləri beynəlxalq humanitar hüququn, eləcə də 1949-cu il Cenevrə Konvensiyası və onun əlavə protokollarının kobud şəkildə pozulmasıdır. Lakin beynəlxalq təşkilatlar, xüsusən münaqişənin həllində vasitəçilik missiyasını üzərinə götürmüş ATƏT-in Minsk qrupu bu cinayətə göz yumur, susqunluq nümayiş etdirir. Bütün bunlar bir daha göstərir ki, Ermənistan BMT-nin Təhlükəsizlik Şurasının qəbul etdiyi 4 qətnamənin tələblərinə uyğun olaraq qoşunlarını Azərbaycanın işğal edilmiş ərazilərindən çıxarmaq haqqında nəinki düşünmür, üstəlik növbəti təxribatlara əl atır, danışıqlar prosesini tam olaraq iflasa aparır. Təcavüzkar ölkə anlamalıdır ki, onun bütün təxribatlarına layiqli cavab verən qüdrətli Azərbaycan Ordusu var. Dünyanın 50 ən güclü ordusu sırasında yer alan Silahlı Qüvvələrimiz işğal altında olan torpaqlarımızı hər an azad etmək gücündədir. Aprel döyüşləri və Tovuz hadisələrində mənfur düşmənə layiqli zərbə vuran ordumuz xalqımıza tarixi qələbə sevincini də yaşadacaq.

K.Seyidov bildirib ki, işğalçı Ermənistanın Dağlıq Qarabağa Suriya və Livan ermənilərinin köçürülmə siyasətində məqsəd aydındır: bu torpaqlarda ermənilərin sayını süni şəkildə artırmaq, ərazilərin etnik-mədəni xüsusiyyətlərinin dəyişdirilməsinə nail olmaq və bu ərazilərin Ermənistana mənsub olması barədə beynəlxalq aləmdə rəy formalaşdırmaq. Ermənistan rəhbərliyi dərk etməlidir ki, bu qanunsuz fəaliyyət və süni məskunlaşdırma cəhdləri heç də istədikləri nəticəni verməyəcək. İşğal olunmuş Dağlıq Qarabağ və ətraf ərazilərin azərbaycanlı əhalisi isti ocaqlarına qayıdacaq, Ermənistan isə bütün qanunsuz əməllərinə görə layiqli cavabını alacaq.