SİYASƏT
Diaspor rəhbəri: Azərbaycanın qazandığı böyük Qələbəni və digər uğurları Yaponiya ictimaiyyətinə çatdırmaq üçün bundan sonra da əzmlə çalışacağıq
Tokio, 30 dekabr, AZƏRTAC
Başa çatmaqda olan 2020-ci ildə Vətən müharibəsində qazanılan böyük Qələbənin və Azərbaycanın digər uğurlarının Yaponiya ictimaiyyətinə çatdırılması üçün bundan sonra da əzmlə çalışacağıq.
Bu sözləri AZƏRTAC-a müsahibəsində tanınmış alim, Azərbaycan-Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntər deyib. Azərbaycan Respublikası Diasporla İş üzrə Dövlət Komitəsinin bu il Dünya Azərbaycanlılarının Həmrəyliyi Günü münasibətilə Azərbaycan diasporunun fəaliyyətinə mühüm töhfələr verən diaspor təşkilatlarının rəhbərlərini və diaspor fəallarını xüsusi medal və təşəkkürnamə ilə təltif etdiyini xatırladan X.Kələntər göstərilən diqqətə görə Azərbaycan Prezidentinə və komitə rəhbərliyinə minnətdarlığını bildirib.
Qeyd edilib ki, bu mükafat Yaponiyada fəaliyyət göstərən diaspor təşkilatının hər bir üzvünün əməyinə verilən yüksək qiymətdir. Vurğulanıb ki, Prezident İlham Əliyevin qarşıya qoyduğu vəzifələrə uyğun olaraq, səfirliklə birgə fəaliyyət göstərən diasporumuz 44 günlük Vətən müharibəsi dövründə Azərbaycan həqiqətlərinin təbliği, şanlı Ordumuzun torpaqlarımızı azad etməsi haqqında xəbərlərin Yaponiya ictimaiyyətinə çatdırılması istiqamətində var gücü ilə çalışıb. Yaponiyanın telekanallarında və müxtəlif kütləvi informasiya vasitələrində çıxış edən diaspor fəalları Dağlıq Qarabağın tarixi Azərbaycan torpaqları olması barədə həqiqətlərin yapon ictimaiyyətinə çatdırılmasına nail olublar. Həmin çıxışlarda, məqalələrdə ermənilərin Azərbaycan torpaqlarında törətdiyi vandalizm aktları barədə ətraflı məlumatlar verilib.
Qarşıdan gələn 2021-ci ildə Yaponiyada fəaliyyət göstərən diaspor təşkilatımızın üzərinə daha böyük vəzifələr düşdüyünü vurğulayan X.Kələntər müxtəlif vasitələrlə yapon KİV-lərinə yol tapan erməni təbliğatının qarşısını almaq üçün daha əzmlə çalışmaq lazım olduğunu bildirib. Qeyd edib ki, bu yalan və iftira dolu məlumatların qarşısının alınması, onlara vaxtında və tutarlı, tarixi faktlara və müasir reallıqlara əsaslanan cavabların verilməsi istiqamətində daha səmərəli fəaliyyət göstərməyə çalışacaqlar.
Diaspor rəhbəri əlavə edib ki, Vətən müharibəsi günlərində Yaponiyadakı hər bir azərbaycanlı təşkilatın “Facebook” səhifəsində və digər sosial şəbəkələrdə bu səyləri ardıcıl şəkildə aparıb və bundan sonra da həmin istiqamətdə iş davam etdiriləcək. Diaspor təşkilatımız bundan sonra da Yaponiyada doğma Azərbaycanımızın haqq səsinin daha çox yayılması, xalqımızın qədim tarixinin və zəngin mədəniyyətinin təbliği istiqamətində səylərini artıracaq.
Vüqar Ağayev
AZƏRTAC-ın xüsusi müxbiri
Tokio