REGİONLAR
Dostluq və qardaşlıq nümunəsi
Ağdam, 16 iyul, Tahir Ağaməmmədov, AZƏRTAC
Türkiyə ilə Azərbaycan arasında dostluq və qardaşlıq əlaqələri qədim tarixi köklərə malikdir. Bu xalqlar həmişə bir-birinə dəstək nümayiş etdirib, ən ağır günlərində bir-birinin yanında olub, “Bir millət, iki dövlət” kəlamını layiqincə doğruldublar.
Bunu AZƏRTAC-ın bölgə müxbirinə Xocavənd Rayon Gənclər və İdman İdarəsinin rəisi Aslan Quliyev bildirib.
Son günlər Azərbaycan-Ermənistan sərhədində baş verən hadisələr zamanı da qardaş Türkiyənin Azərbaycanın yanında olduğunu vurğulayan A.Quliyev deyib: “İyulun 12-də Ermənistan silahlı qüvvələrinin bölmələri növbəti dəfə təxribata əl ataraq Azərbaycan-Ermənistan dövlət sərhədinin Tovuz istiqamətində mövqelərimizi ələ keçirməyə, artilleriya atəşindən istifadə edərək hücuma keçməyə cəhd göstərib. Azərbaycan Ordusunun həyata keçirdiyi əks-tədbirlər nəticəsində düşmən geri oturdulub, onun canlı qüvvəsinə və hərbi texnikasına ciddi zərər yetirilib. Ən ağır günlərimizdə həmişə bizimlə olan qardaş Türkiyə Cümhuriyyəti Ermənistanın atəşkəsi pozmasını şiddətlə qınayıb və hər zaman olduğu kimi Azərbaycanın yanında olduğunu bildirib. Türkiyə Xarici İşlər Nazirliyi təxribatdan dərhal sonra bəyanatla Ermənistan tərəfinin təxribatını kəskin pisləyib. Bundan başqa, Türkiyənin Xarici İşlər naziri Mövlud Çavuşoğlu “Tvitter”dəki hesabında Türkiyənin və Azərbaycanın dövlət himnlərinin səsləndirildiyi “Can Azərbaycana canımız fəda” başlıqlı videoçarx paylaşaraq ölkəmizlə birlikdə olduqlarını obrazlı şəkildə ifadə etdi”.
Aslan Quliyev bildirib ki, soy-kökü, dil, mədəniyyət və digər ortaq mənəvi dəyərlərlə bir-birinə bağlı olan Azərbaycan və Türkiyə arasındakı münasibətlər bu gün də öz axarı ilə inkişaf edir. Hər iki dövlətin rəhbərləri təkcə mehriban qonşuluq siyasətini deyil, ölkələrimizin daha da yaxınlaşmasını şərtləndirən mənəvi prinsipləri əsas götürərək tarixən mövcud olmuş əlaqələrin daha yüksək səviyyəyə çatdırılması üçün bütün zəruri addımları atırlar. Ümummilli lider Heydər Əliyevin “Bir millət, iki dövlət” kimi xarakterizə etdiyi Azərbaycan-Türkiyə münasibətləri ölkələrimizin rəhbərliklərinin həyata keçirdikləri siyasət nəticəsində durmadan inkişaf edir, iki xalq arasında əlaqələrin səviyyəsi keyfiyyətcə yeni mərhələyə keçir. Azərbaycan-Türkiyə qardaşlığı sarsılmazdır və böyük geosiyasi və geoiqtisadi potensiala malik bu iki ölkənin strateji əməkdaşlığı regionda sülhün və təhlükəsizliyin təmin edilməsinə, habelə bölgədə iqtisadi inkişafın daha da gücləndirilməsinə yönəlib. Azərbaycan və Türkiyəni bir-birinə bağlayan strateji layihələrin reallığa çevrilməsi hazırda bu iki qardaş xalq arasındakı əlaqələrin möhkəmliyini daha da artırmaqdadır.
“Tarixin müxtəlif mərhələlərində bir-birlərinə dəstək nümayiş etdirmiş Türkiyə və Azərbaycan bu ənənəni indi də davam etdirir. Ölkələrimizi nəinki tarixi köklər, adət və ənənələr, həm də dövlətlərimizin müstəqilliyinin və suverenliyinin möhkəmləndirilməsi, regionumuzda sülhün və sabitliyin bərqərar edilməsi kimi ümummilli mənafelər birləşdirir. Bu iki türk dövlətinin sıx, bərabərhüquqlu və səmərəli əməkdaşlığı zamanın hökmüdür, tariximizdən irəli gələn obyektiv zərurətdir. Böyük türk xalqının maraqlarının qorunması və etibarının yüksəldilməsi uğrunda aparılan mübarizədə qardaşların bir-birinə dəstək verməsindən başqa bir iş ola bilməz. Dünya sivilizasiyasının inkişafına böyük töhfələr vermiş olan böyük türk xalqı bu vəzifənin öhdəsindən layiqincə gəlir. İki türk dövləti qoşa addımladıqca daha güclü olurlar!”, - deyə Aslan Quliyev bildirib.