Naxçıvan, 6 avqust, AZƏRTAC 

Muxtar respublika ərazisində ekoloji tarazlığın qorunması, əlverişli ekoloji mühitin yaradılması, insanların sağlam ətraf mühitdə yaşamasının təmin edilməsi məqsədilə sosial-ekoloji siyasət ötən ay ərzində də uğurla həyata keçirilib.

Naxçıvan Muxtar Respublikası Ekologiya və Təbii Sərvətlər Nazirliyindən AZƏRTAC-ın Naxçıvan bürosuna bildirilib ki, hesabat ayında ətraf mühitin mühafizəsi, qanunsuz ov edilməsi, meşə fondu torpaqlarından qanunsuz istifadə, ətraf mühitə atılan tullantıların normadan artıq olması hallarına qarşı mübarizə məqsədilə 8 yoxlama-reyd keçirilib, 3 inzibati xəta qeydə alınıb və qanunauyğun tədbir görülüb.

Ötən ay Şərur, Ordubad, Babək, Şahbuz, Sədərək və Culfa rayonlarının yaşayış məntəqələri ərazilərində ekoloji monitorinqlər aparılıb, məişət, tibbi və bərk tullantıların idarəolunması kimi fəaliyyət sahələrində qiymətləndirmə işləri həyata keçirilib. İyul ayında Araz və Arpaçay çaylarının muxtar respublikaya daxil olan hissəsindən və Sədərək rayonu ərazisindən keçən Şir arxından su nümunələri götürülərək Sədərək Rayon Su Monitorinq Laboratoriyasında analizlər aparılıb, nəticəyə görə sularda çirklənmə hallarının yol verilə bilən qatılıq həddini keçməsi qeydə alınmayıb.

Hesabat ayında da muxtar respublika ərazisində yaşıllıqların, meşələrin qorunması və artırılması diqqətdə saxlanılıb. Belə ki, Naxçıvan Sement Zavodunun ətrafında salınmış püstə bağına aqrotexniki qaydada qulluq göstərilib, dərmanlama işləri görülüb, su arxı təmir olunub, damcı üsulu ilə suvarma aparılıb. Qoşadizə tingçilik sahəsindəki toxmacarlıqlarda 7,6 hektar sahədə suvarma aparılıb, 1,8 hektar sahə alaq otundan təmizlənib. Həmçinin 818 kiloqram müxtəlif meyvə və meşə ağaclarının toxumları tədarük olunub. Toxum tədarükü mövsümə uyğun olaraq davam etdirilir.

Ötən illərdə salınmış meyvə bağlarına aqrotexniki qaydada qulluq göstərilib, suvarma aparılıb, ərazilərə üzvi gübrələr verilib. Uzunoba Su Anbarının yuxarı hissəsindəki meyvə bağlarında 365, Uzunoba Dövlət Meşəsi ətrafındakı ərazidə 100, Duzdağ Fizioterapiya Mərkəzinə gedən yolun sol kənarındakı meyvə bağında isə 30 ədəd dibçəkdə yetişdirilən müxtəlif meyvə tingləri ilə bərpa aparılıb. Eyni zamanda yaşıllıq zolaqlarında ağacların ziyanverici həşəratlardan mühafizə olunması üçün dərmanlama işləri görülüb.

Geoloji Axtarış və Kəşfiyyat İdarəsi üzrə geoloji axtarış, kameral və ümumi xarakterli işlər yerinə yetirilib.

Ərəzin sahəsində aparılacaq mövsümi çöl işlərinə hazırlıq yekunlaşdırılaraq bu işə başlanılıb. Aparılan axtarış-qiymətləndirmə işləri zamanı səpinti qızılın yer səthində və dərinlikdə yayılma qanunauyğunluqlarını öyrənmək məqsədilə kəşfiyyat şəbəkəsinə uyğun olaraq yerüstü dağ qazma işləri, şurf keçilmiş, yerüstü dağ qazmalarından 25 ədəd şırım sınağı götürülüb. Naxçıvan şəhəri, “48-ci məhəllə”də tikiləcək yeni binaların smeta sənədləri hazırlanıb, mühəndis-geoloji işlərinə başlanılıb.

Naxçıvan Muxtar Respublikasında yaradılacaq İlandağ Geoparkının ərazisinə aid Culfa, Ordubad, Babək sahələrindəki geosidlərin fotoları çəkilib və onlar haqqında qısa məlumat hazırlanıb.

2020-ci ilin yaylaq mövsümü dövründə Culfa rayonunun Dəmirli ərazisində, Şahbuz rayonunun Qanlıgöl yaylağı, Gömür dağı ərazilərində və Ordubad rayonundakı yaylaqlarda məskunlaşmış fermerlərlə maarifləndirici söhbətlər aparılıb. Belə maarifləndirici tədbirlər bundan sonra da davam etdiriləcək.