SİYASƏT
Ermənistanın təxribat xarakterli son addımları bu ölkənin faşizm ideologiyasına xidmət etdiyini bir daha göstərir
Bakı, 2 sentyabr, AZƏRTAC
Ermənistanın təxribat xarakterli son addımları bu ölkənin faşizm ideologiyasına xidmət etdiyini bir daha göstərir. Artıq hər kəsə məlumdur ki, Ermənistanda faşizm ideologiyası dövlət siyasətinə çevrilib. Njde, Dro kimi faşistlər Ermənistanda qəhrəmanlaşdırılır, bu antibəşəri fəaliyyət dövlət siyasəti səviyyəsində icra edilir. Elə Paşinyan da öz sələflərinin siyasətini davam etdirərək faşistlərin qəhrəmanlaşdırılmasına bəraət qazandırır. Hazırda Ermənistan hakimiyyətində təmsil olunan bir çox yüksək vəzifəli şəxslər faşistlərin nəsillərinin davamçılarıdır, onlar ailə bağları ilə faşizm ideyalarına sadiqdirlər, bu xislətləri ilə fəxr edirlər. Təsadüfi deyil ki, Paşinyanın babası da faşist olub, onun irqi amilə görə yəhudilərin kütləvi şəkildə məhv edilməsində iştirakına dair tutarlı faktlar var.
Bu fikirləri AZƏRTAC-a açıqlamasında Yeni Azərbaycan Partiyası Səbail rayon təşkilatı sədrinin müavini, politoloq Mehman İsmayılov deyib.
Mehman İsmayılov qeyd edib ki, Ermənistan ənənəvi siyasətini, yəni, işğalçılıq və terrorçuluq siyasətini davam etdirir. Ermənistanın baş naziri Nikol Paşinyanın son günlərdəki fəaliyyəti bu ölkənin sülh danışıqlarına hazır olmadığını, bunu qətiyyən qəbul etmədiyini, əksinə, gərginliyin artırılması və işğalçılıq siyasətinin davam etdirilməsi məqsədini daşıdığını göstərir. Paşinyanın işğal edilmiş Dağlıq Qarabağ bölgəsinə səfəri, hərbi obyektlərdə olması göstərir ki, təcavüzkar ölkənin hakimiyyəti Azərbaycana qarşı yeni hücum planları qurur. Bu, açıq-aydın işğalçı ölkənin hərbi əməliyyatların yenidən bərpası, növbəti təxribat fəaliyyətinə başlaması niyyətinin göstəricisidir. Onun Tovuz istiqamətində Azərbaycanla sərhəd xəttində təxribat törətməkdə fərqlənmiş erməni hərbçilərini mükafatlandırması, hətta onlardan birinə “Milli qəhrəman” adını təqdim etməsi İyul döyüşlərindən sonra Ermənistan ordusundakı ruh düşkünlüyünü aradan qaldırmağa hesablanıb. Bununla yanaşı, Paşinyan daxildə baş qaldıran siyasi, iqtisadi, sosial problemləri bu cür ört-basdır etməyə, eyni zamanda, aşağı düşən nüfuzunu bu yolla bərpa etməyə cəhd edir. Bundan başqa, Paşinyan nəinki siyasi cəhətdən natamam fiqur olmaqla kifayətlənmir, eyni zamanda, özünün və ailə üzvlərinin adı mafiyalar qurmaqda, dağ-mədən sənayesi məhsulları, silah satışı və siqaret alverində hallandırılır. Onun Qarabağa səfər etməsində digər məqsəd də məhz ailə biznesini genişləndirmək, Azərbaycanın işğal olunmuş ərazilərindən qızıl və digər metalların qeyri-qanuni istismarındakı payını götürməkdir. Odur ki, səfər çərçivəsində Paşinyanın Dağlıq Qarabağın Ağdərə rayonundakı “Beys Metls” şirkətinin dağ-mədən kompleksində olması da təsadüfi xarakter daşımır.
Politoloq deyib ki, hər keçən gün münaqişənin sülh yolu ilə həllini daha da dalana dirəyən addımlar atmaqla terrorçu və işğalçı missiyasını nümayiş etdirən Ermənistan daha bir mənfur niyyətini həyata keçirməkdədir. Bu da Livandan bir qrup erməni ailəsinin işğal altında olan Azərbaycanın Dağlıq Qarabağ bölgəsinə yerləşdirilməsidir. Bu, çox təhlükəli tendensiyadır və beynəlxalq hüquqa ziddir. Bu, hər şeydən əvvəl 1949-cu ildə qəbul edilmiş Cenevrə Konvensiyası və onun protokoluna ziddir. Ermənistanın əsas məqsədi Livandan işğal olunan bölgələrə süni köçlər vasitəsilə boş əraziləri iqtisadi cəhətdən canlandırmaq və yeni demoqrafik vəziyyətin yaradılması ilə gələcəkdə azərbaycanlıların doğma torpaqlarına geri dönməsinə əngəl törətməkdir. Hətta ASALA erməni terror təşkilatının tarixən Livan ərazisində formalaşdığı nəzərə alınarsa, xüsusi düşərgələrdə təlim keçmiş terrorçuların Azərbaycan ərazilərinə gəlməsi istisna edilmir. Beynəlxalq ictimaiyyət, xüsusilə də ATƏT-in Minsk qrupunun həmsədrləri bu təhlükəli məsələlərə dərhal reaksiya verməli və müvafiq tədbirlər görülməlidir.