Bakı, 14 sentyabr, AZƏRTAC

Sentyabrın 14-də Fövqəladə Hallar Nazirliyinin (FHN) Dövlət Yanğın Nəzarəti Xidmətində (DYNX) “Respublika ərazisində fəaliyyət göstərən lisenziya şirkətləri tərəfindən yanğından mühafizə sistemlərinin qanunvericiliyin tələblərinə uyğun quraşdırılması, mövcud problemlər və aradan qaldırılması yolları” mövzusunda iclas keçirilib.

FHN-dən AZƏRTAC-a bildiriblər ki, iclasda xidmətin aidiyyəti şöbə və sektorlarının əməkdaşları ilə yanaşı 76 lisenziya şirkətinin rəhbəri iştirak edib.

Tədbiri giriş sözü ilə açan DYNX-nin rəis müavini, daxili xidmət polkovniki Rəşad Əbilov son zamanlar yanğından mühafizə fəaliyyəti üzrə müxtəlif növ lisenziya almış şirkətlərin görmüş olduğu işlərin keyfiyyətinin aşağı olması, sertifikata uyğun olmayan materiallardan istifadə edilməsi, siqnalizasiya sistemlərinə sadəcə biznes kimi yanaşılması, eləcə də siqnalizasiya sistemlərinin bəzi yerlərdə aksesuarlara çevrilməsi hallarına rast gəlindiyini qeyd edib.

Çıxış edən natiqlər bununla yanaşı, şirkətlər tərəfindən müvafiq layihə sənədlərinin hazırlanmaması, təhvil verilmiş sistemin profilaktika etmədən, sifarişçi ilə bağlanmış müqavilənin şərtlərinə riayət olunmaması barədə fikirlər səsləndiriblər. Elə bu səbəbdən də Xidmətin rəisi daxili xidmət general-mayoru İsrayıl Əliyevin tapşırığına əsasən mövcud problemlərin həlli məqsədilə lisenziya şirkətlərinin rəhbərləri ilə birgə müzakirənin aparılmasının vacibliyi vurğulanıb.

İclasda mövcud problemlərin həlli istiqamətində qabaqlayıcı tədbirlərin görülməsi, gələcəkdə bu sahədə işlərin normativ tələblərə uyğun aparılması, treninqlərin təşkil edilməsi, görülmüş işlərin hesabatının hazırlanaraq Xidmətə təqdim edilməsi və vətəndaşların maarifləndirilməsi üçün lazımi təbliğat işlərinin həyata keçirilməsi prioritet məsələ kimi qərara alınıb.

İclasda çıxış edən lisenziya şirkətlərinin rəhbərləri, DYNX-nin məsul əməkdaşları mövcud problemlərdən söz açmaqla yanaşı, həlli yollarından da danışıb, müzakirələr aparıblar.