Bakı, 10 oktyabr, AZƏRTAC

Bir il bundan əvvəl Cəbrayıl işğaldan azad ediləndə hamı məni təbrik edirdi. Mən isə göz yaşlarımı saxlaya bilmirdim. Kəndimiz azad olunandan iki gün əvvəl anam rəhmətə getdi. 27 il bu günü- Horovlunun azad olunmasını həsrətlə gözləsə də, bu günü görmək anama qismət olmadı. Bu, mənim ürəyimdə bir qubardır.

Bu fikirləri AZƏRTAC-a müsahibəsində Cəbrayıl sakini, M.A.Topçubaşov adına Elmi Cərrahiyyə Mərkəzinin ürək cərrahlığı şöbəsinin müdiri Fazil Abbasov söyləyib.

Oktyabrın 4-də Cəbrayılın azad edilməsinin ildönümündə Prezident, Müzəffər Ali Baş Komandan İlham Əliyevin rayon ictimaiyyətinin nümayəndələri ilə görüşünün unudulmaz və tarixi hadisə adlandıran Fazil Abbasov deyib: “Biz Cəbrayılın xarabalıqlarına baxanda, xüsusilə üzərində qartal heykəli olan abidənin yerləşdiyi təpəni, onun ətrafındakı dağılmış evləri görəndə təəssüflənsək də, qəlbimiz çox rahat idi. Çünki Cəbrayılın parlaq sabahına, xoş gələcəyinə inam vardı. O inamı, sevinc və qürur hisslərini bizə yaşadan Azərbaycan Prezidenti, Müzəffər Ali Baş Komandan İlham Əliyev və şanlı Ordumuzdur”.

Cəbrayıl, doğma Horovlu kəndi işğaldan azad olunduqdan sonra oralara getmək istəmədiyini deyən Fazil bunun səbəbini belə izah edir: “Kəndimizdən olan hərbçilər evimizin xarabalıqları əks olunmuş fotoşəkillər göndərmişdilər. Onlara baxanda ürəyim dözmürdü, çox pis olurdum. Mənə elə gəlirdi ki, ürəyim bu saat dayanacaq. Bir vaxtlar abad qoyub gəldiyim kəndimi xarabazara çevrilmiş şəkildə görmək istəmirdim. Bilirdim ki, getsəm, ürəyim elə orada da dayanacaq. Şükürlər olsun, azad edilmiş ərazilərdə bu gün geniş bərpa və quruculuq işləri aparılır. Tezliklə insanlarımız öz doğma yurd-yuvalarına qayıdacaqlar”.

Prezident İlham Əliyevlə görüşdə iştirak etməyin böyük şərəf olduğunu vurğulayan tibb elmləri doktoru deyib ki, dövlətimizin başçısı xarici media nümayəndələrinə verdiyi müsahibələrdə, eləcə də çıxışlarında Qarabağın tarixi ilə bağlı həqiqətləri, onun əzəli Azərbaycan torpağı olduğunu təkzibolunmaz faktlarda dünya ictimaiyyətinə çatdırır, sanki dərs keçir. Oktyabrın 4-də Cəbrayıl rayon ictimaiyyətinin nümayəndələri ilə görüşündə də Prezident İlham Əliyev Ermənistan rəhbərliyinə və onların havadarlarına bir daha aydın və birmənalı mesajlar verdi. Qətiyyətlə dedi ki, biz öz torpaqlarımızı göz-bəbəyimiz kimi qoruyacağıq, xalqımız burada əbədi yaşayacaq.

Prezidentimiz hər birimizlə ayrı-ayrılıqda da görüşdü və şərait yaratdı ki, hər bir Cəbrayıl sakini öz fikirlərini bildirsin, ürəyindən keçənləri desin. Mən də bu imkandan istifadə edərək dövlətimizin başçısına 2011-ci ildə M.A.Topçubaşov adına Elmi Cərrahiyyə Mərkəzinin açılışında iştirak etdiyi üçün təşəkkürümü çatdırdım. Dedim ki, mərkəzin kollektivi Sizin etimadınızı layiqincə doğrultmağa çalışır.

Hamı kimi, mənim də Prezidentimizə hörmətim, məhəbbətim sonsuzdur. Çünki Prezident İlham Əliyev nüfuzlu Lider olmaqla yanaşı, həm də çox səmimi insandır. O, bizə torpaqlarımızı qaytarıb, Azərbaycanın ərazi bütövlüyünü təmin edib, bizi gözükölgəli yaşamaqdan xilas edib. Azərbaycan Prezidenti dünya miqyasında mükəmməl siyasi xadim, əsl Liderdir. Onun kimi sərrast mühakimə yürütməyi, məntiqli və tutarlı faktlarla danışmağı hər ölkə rəhbəri bacarmır.

Fazil Abbasov deyib ki, hazırda dünya ölkələri lider problemindən əziyyət çəkir: “İkinci Dünya müharibəsi illərini xatırlayıram. Təsəvvür edirsiniz, həmin dövrdə ölkə rəhbərləri öz baxışları ilə indikilərdən çox fərqlənirdilər. Müharibənin törətdiyi çətinlikləri xalqlar məhz həmin liderlərin dəstəyi və köməyi sayəsində aradan qaldırıblar. İndi bizə ağıl öyrədən Qərb dövlətlərinin liderlərinin fəaliyyəti göz qabağındadır. Çox sevindiricidir ki, dünyanın hazırda ən qabaqcıl liderlərinin ikisi türk dünyasına məxsusdur - Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan.

Dövlətimizin başçısı son 18 il ərzində Azərbaycanın dünyada nüfuzunun və qüdrətinin artması üçün çox mühüm işlər görüb. İqtisadiyyatımız möhkəmlənib, ümumiyyətlə, bütün sahələrdə inkişaf əldə olunub. 44 günlük Vətən müharibəsində qalib gəlməyimizin əsas səbəblərindən biri məhz budur. Müdrik və uzaqgörən siyasəti ilə seçilən Prezidentimiz həmişə deyir ki, bizim sözümüz bizim imzamızdır.

Mən dövlətimizin başçısının səmimiyyəti Cəbrayıl şəhərinin təməlqoyma mərasimində bir daha gördüm. Bizim hər birimizdən bünövrəyə palçıq atmağımızı xahiş etdi və dedi ki, bu mərasimdə hamı iştirak etsin, çünki bu, tarixdir.

Mən hərdən şeir də yazıram. Bir şeirimin sonuncu bəndində belə yazmışdım:

Qorxuram ki, qəfil əcəl yetirə,

Necə ölüm, o yerləri görməmiş.

O torpaqlar çətin məni götürə,

Bu torpaqlar halallığın verməmiş.

Bu sətirləri Prezidentimizə oxudum. Çox xoşuna gəldi və qayıdıb dedi ki, ölmək yox, yaşamaq lazımdır.