Bakı, 24 dekabr, AZƏRTAC

Azərbaycan Respublikasının Biznes mühiti və beynəlxalq reytinqlər üzrə Komissiyasının Fiziki infrastruktur üzrə İşçi Qrupunun cari ilin yekunlarına dair növbəti onlayn iclası keçirilib.

Rəqəmsal İnkişaf və Nəqliyyat Nazirliyindən AZƏRTAC-a bildirilib ki, İşçi Qrupunun rəhbəri, rəqəmsal inkişaf və nəqliyyat nazirinin müavini Rövşən Rüstəmov iclası açıq elan edərək 2021-ci il ərzində qrupun fəaliyyəti barədə ətraflı məlumat verib.

Tədbirdə qrupun əvvəlki iclasının Protokolundakı qərarların icra vəziyyəti, 2021-ci il üçün Fəaliyyət Planında əks olunmuş tədbirlərin icrasının qiymətləndirilməsi və bu qiymətləndirmənin nəticələri haqqında hesabat iclas iştirakçılarının diqqətinə çatdırılıb.

Sonra növbəti ildə görüləcək işlər və İşçi Qrupunun 2022-ci il üçün Fəaliyyət Planının layihəsi müzakirə edilib.