Bakı, 25 iyun, AZƏRTAC

Bakıda keçirilən BMT-nin Dövlət Xidmətləri Forumu çərçivəsində "Xidmətlərin göstərilməsi, keyfiyyətin idarə olunmasi və liderlik rolunun əlaqələndirilməsi: Qərbi Balkan ölkələri, Gürcüstan və Azərbaycandan öyrənilmiş təcrübələr" mövzusunda tədbir təşkil olunub.

AZƏRTAC xəbər verir ki, ReSPA tərəfindən təşkil olunan bu tərəfdaş tədbirdə Qərbi Balkanlarda dövlət xidmətlərinin göstərilməsinin inkişafı məsələsi araşdırılıb.

Tədbirin məqsədi Dayanıqlı İnkişaf Məqsədlərinin lokallaşdırılmasındakı mövcud problemlərin diqqətə çatdırılması, 2030-cu il Gündəliyinin həyata keçirilməsi üçün səmərəli qeyri-mərkəzləşdirilmiş idarəçiliyin necə qurulmalı olduğunun müzakirəsi olub.

Bu tədbir üç sessiyadan ibarət olub. Sessiyalar "Qərbi Balkanlarda dövlət xidmətlərinin göstərilməsi sahəsində vəziyyət", "Dövlət xidmətlərinin göstərilməsində ilhamverici hallar", " Dövlət idarəçiliyində liderlik və peşəkarlıq dövlət xidmətlərinə necə təsir edir?" mövzularında keçirilib.

Sessiyada çıxış edən Elektron Hökumətin İnkişafı Mərkəzinin direktoru Fariz Cəfərov Mərkəzin müasir informasiya texnologiyalarından istifadə etməklə dövlət qurumları tərəfindən Azərbaycan Respublikasının ərazisində yaşayan bütün vətəndaşlara, hüquqi və fiziki şəxslərə, xarici vətəndaşlara və vətəndaşlığı olmayan şəxslərə informasiya və e-xidmətlərin göstərilməsini təmin etdiyini bildirib. O qeyd edib ki, Mərkəzin fəaliyyət istiqamətləri başlıca olaraq elektronlaşdırılmış dövlət xidmətləri, e-viza verilməsi və rəqəmsal ödəniş sistemləri üzrə xidmətləri əhatə edir. Qeyd olunan sahələrdə xidmət keyfiyyətinin yüksəldilməsi, xidmətdən yararlanmanın asanlaşdırılması və vətəndaş məmnunluğunun artırılması məqsədilə qabaqcıl beynəlxalq təcrübələr araşdırılıb və vətəndaş ehtiyacları nəzərə alınmaqla innovativ yeniliklər tətbiq olunub.

Direktor Elektron Hökumət portalı, "myGov" portalı, "ASAN Viza", "ASAN Ödəniş", "ASAN Finans", "e-Agro" və digər layihələr haqqında da məlumat verib.

Azərbaycan Respublikasının Prezidenti yanında Dövlət İdarəçilik Akademiyasının rektoru akademik Urxan Ələkbərov istənilən uğurun əsasında liderlik və peşəkarlığın dayandığını, bunun üçün isə insan resurslarının gücləndirilməsinin vacibliyini vurğulayıb. O bildirib ki, dövlət qulluqçuları üçün təlimlərin keçirilməsi bu istiqamətdə atılan faydalı addımlardandır. Rektor deyib: "2018-ci il Davos Forumunun hesabatında inklüziv inkişaf indeksinə görə, Azərbaycan keçid iqtisadiyyatına malik ölkələr arasında 3-cü yerdə qərarlaşaraq, iqtisadi imkanları daha yüksək olan Avropa İttifaqı ölkələrinin çoxunu geridə qoyub. Həmçinin Dünya İqtisadi Forumunun təsisçisi və fəxri prezidenti Klaus Şvabın hazırladığı qlobal hesabatda Azərbaycan dünyanın ən səmərəli sosial siyasət həyata keçirən ölkəsi kimi xarakterizə edilib".

Tədbirdə çıxış edən xarici qonaqlar da öz ölkələrinin bu sahədəki təcrübələrindən danışıblar.