DÜNYA
Fumio Kişida son 10 ildə rəsmi iqamətgaha köçən ilk Baş nazir olacaq
Tokio, 12 dekabr, AZƏRTAC
Yaponiyanın Baş naziri Fumio Kişida Tokionun mərkəzində yerləşən və hökumət binalarına daxil olan rəsmi iqamətgaha köçmə işlərini yekunlaşdırıb.
AZƏRTAC xəbər verir ki, bu barədə dekabrın 12-də Baş nazirin dəftərxanasına məxsus saytda məlumat yerləşdirilib.
“Mən özümü uzunmüddətli fasilədən sonra baş verən yerdəyişmədən məmnun və yenilənmiş kimi hiss edirəm. Bu qərarın bütün diqqətimi dövlət işlərinə yönəltmək baxımından əhəmiyyətli olacağını düşünürəm”, - deyə F.Kişida qeyd edib. Onunla birlikdə rəsmi iqamətgaha hazırda Baş nazirin katibi vəzifələrini həyata keçirən oğlu Syotaronun köçdüyü də bildirilir. Hökumət başçısının həyat yoldaşına gəlincə isə, F.Kişida bu suala konkret cavab verməyib. Yalnız xanımının Tokionu tez-tez tərk edərək doğma şəhərinə getdiyini və buna görə də onun ailəsi ilə nə vaxt birlikdə ola biləcəyini söyləməkdə çətinlik çəkdiyini deyib.
Məlumat üçün qeyd edək ki, cari ilin oktyabrında Baş nazir seçildikdən sonra F.Kişida parlament deputatları üçün yataqxanada yaşayırdı. Həmin yataqxana Baş nazirin Akasaka rayonundakı dəftərxanasından maşınla cəmi üç dəqiqəlik məsafədə yerləşir. Baş nazirin rəsmi iqamətgahı isə əsas ofisə bitişikdir və bu, ona hər hansı fövqəladə vəziyyət zamanı çox qısa müddətdə öz vəzifələrinin icrasına başlamaq imkanı yaradır.
Əlavə olaraq bildirək ki, Baş nazirin rəsmi iqamətgahından son dəfə sabiq hökumət başçısı Yoşihiko Noda istifadə edib. Y.Noda bu iqamətgahda 2011-ci ilin oktyabrınadək yaşayıb. 2012-ci ilin dekabrında onu əvəz edən Şinzo Abe isə bu iqamətgaha köçməyərək, ailəsi - anası və həyat yoldaşı ilə birlikdə Tokiqaya rayonundakı öz evində yaşayıb. Bu qərarına görə onu tənqid etsələr də, Ş.Abe rəsmi iqamətgaha köçməkdən imtina edib. Məsələ burasındadır ki, istənilən fövqəladə hal baş verdiyi təqdirdə onun əsas ofisə gəlməsinə azı 15 dəqiqə vaxt tələb olunurdu. Ş.Abenin əsas ofisə təcili gətirilməsi ilə bağlı hətta motosikletlərdən istifadə də nəzərə alınmaqla müxtəlif variantlar hazırlansa da, yapon cəmiyyəti bu fikrində qəti idi.
Yaponiya Baş nazirinin rəsmi iqamətgahı tarixi və burada baş verən hadisələrlə əlaqədar diqqəti özünə cəlb edir. Bildirilir ki, 1929-cu ildə inşa edilən rəsmi iqamətgah biri zirzəmi olmaqla dörd mərtəbədən ibarətdir. Onun ümumi sahəsi 7 min kvadratmetr təşkil edir. Binanın inşası zamanı memarlığın ar-deko və ekspressionizm stillərindən istifadə edilib. Bina 2003-cü ildə əsaslı təmir edilib. Onun daxilində yaşamaq üçün otaqlar, kabinet, yemək zalı, xarici liderlər və digər rəsmi şəxslərlə görüşmək üçün xüsusi salon da var. Nümunə üçün deyək ki, 2016-cı ildə Rusiya Prezidenti Vladimir Putinin Yaponiyaya səfəri ərəfəsində TASS informasiya agentliyinin baş direktorunun müavini Mixail Qusman həmin vaxt Baş nazir olan Şinzo Abedən müsahibəni həmin iqamətgahda götürmüşdü.
Qeyd etdiyimiz kimi, Yaponiyada bu bina ilə bağlı çoxsaylı şayiələr və əfsanələr dolaşmaqdadır. Belə ki, iqamətgahın yerləşdiyi ərazi Yaponiya tarixində iz qoymuş bir neçə qanlı hadisə ilə əlaqələndirilir. Hələ 1932-ci ildə 11 dənizçi zabit həmin vaxt Baş nazir olan Tsuoşi İnukaya atəş açaraq hərbi çevrilişə cəhd etmişdi. T.İnuka aldığı yaralardan sonra vəfat etmişdi. Bu hadisə Yaponiya tarixinə “15 may faciəsi” kimi düşüb.
Bundan cəmi dörd il sonra Baş nazir olan Keysuke Okadanın qaynı daha dörd nəfərlə birlikdə növbəti dövlət çevrilişi cəhdinin qurbanı olublar. Həmin hadisə isə Yaponiya tarixində 26 fevral faciəsi kimi yer alıb.
Baş nazir olmuş Tsutomu Hatanın həyat yoldaşı da öz xatirələrində bu binada qeyri-adi atmosfer və üşütmə hiss etdiyini, hətta bir dəfə həyətdəki gölməçənin yanında ağ fiqur gördüyünü yazıb. Onun iqamətgaha dəvət etdiyi ekstrasens isə buradakı bağda hərbçi ruhunun dolaşdığını bildirib.
2000-2001-ci illərdə Yaponiyanın Baş naziri olan Yoşihiro Mori də öz növbəsində, gecələr açılan qapı cəftələrinin səsini eşitdiyini qeyd edib. O, öz xələfi Zyuniçiro Koizumiyə iqamətgahdakı ruhlarla ehtiyatlı davranmağı tövsiyə edib.
İqamətgahdakı ruhlarla yanaşı, yapon siyasətçilər arasında rəsmi iqamətgaha yerləşmənin sürətli istefaya səbəb olması barədə şayiə də dolaşmaqdadır. Yəqin ki, buna görə də Yaponiya hökumətinə başçılıq etmiş yalnız yeddi nəfər bu iqamətgahda yaşamağa razı olmuşdu. Əgər tarixə nəzər salsaq, həqiqətən də burada yaşayan Baş nazirlərin çox qısa müddət - ən çoxu iki il hökumətə başçılıq etdiyi faktının şahidi olarıq. Onların arasında yalnız 1982-1987-ci illərdə Baş nazir olan Yaşuhiro Nakasone və 2001-2006-cı illərdə hökumətə başçılıq etmiş Zyuniçiro Koizumi istisna təşkil edir. Bununla yanaşı, Z.Koizumidən sonra Şinzo Abe (2006-2007-ci illər) də daxil olmaqla Baş nazir vəzifəsini tutan altı nəfər cəmi bir il hökumətə başçılıq edə bilmişdi.
2012-ci ildə yenidən Baş nazir seçilən Ş.Abe rəsmi iqamətgaha köçməkdən imtina etmiş və 2800 gün hökumətə başçılıq edərək bu vəzifədə rekord müəyyən etmişdi. Ş.Abeni əvəz edən Y.Suqa da rəsmi iqamətgaha köçməmiş və buna görə müxalifətin kəskin tənqidi ilə qarşılaşmışdı.
F.Kişidaya gəlincə isə, yeni Baş nazirin koronavirusun bütün dünyanı ağuşuna aldığı və ciddi iqtisadi problemlərə səbəb olduğu bir vaxtda hakimiyyətə gəldiyini, həmçinin onun sələfi Y.Suqanın cəmi bir il Baş nazir vəzifəsində qaldığını nəzərə alsaq bu barədə proqnozlar vermək çox çətindir.
Vüqar Ağayev
AZƏRTAC-ın xüsusi müxbiri
Tokio