AZƏRTAC xəbər verir ki, Azərbaycan Gəncləri günü münasibətilə respublikanın Muğan bölgəsindəki rayonlarda bir sıra maraqlı tədbirlər keçirilmişdir.

Əli Bayramlı gəncləri əvvəlcə ümummilli lider Heydər Əliyevin abidə-kompleksini ziyarət etmiş, ulu öndərin heykəli önünə gül-çiçək dəstələri düzmüş, dahi rəhbərin xatirəsini ehtiramla anmışlar.

“Tural” şadlıq sarayında təşkil olunmuş toplantıda rayon gənclər və idman idarəsinin rəis əvəzi Rəşad Abbasovun məruzəsi dinlənilmişdir. Natiq ölkəmizdə həyata keçirilən nəhəng quruculuq proqramının icrasında gənclərin mühüm rol oynadıqlarını nəzərə çarpdırmış, bünövrəsi ümummilli lider Heydər Əliyev tərəfindən qoyulmuş gənclər siyasətinin onun layiqli siyasi varisi Prezident İlham Əliyev tərəfindən uğurla davam etdirildiyini vurğulamışdır.

Şəhər icra hakimiyyəti başçısının birinci müavini Samid Abıyev yığıncağa qatılanları bayram münasibətilə təbrik etmişdir.

Toplantı iştirakçıları sonda ölkəmizin Prezidentinə müraciət göndərmişlər. Tədbir maraqlı ədəbi-bədii proqramla bitmişdir.

X X X

İmişli gəncləri ümummilli lider Heydər Əliyevin mədəniyyət və istirahət parkındakı heykəlinin önünə gül-çiçək dəstələri düzmüş, ulu öndərin xatirəsini ehtiramla yad etmişlər.

Mədəniyyət sarayında təşkil olunmuş toplantıya 47 gənclər təşkilatını təmsil edən 200-dən çox nümayəndə qatılmışdır. Gənclər və idman idarəsinin rəisi Akif Nəsirov toplantı iştirakçıları qarşısında çıxış edərək, cəmiyyətin aparıcı qüvvəsinə çevrilmiş gənclərin ölkəmizin Prezidenti İlham Əliyevin diqqəti və qayğısı ilə əhatə olunduğunu xüsusi vurğulamış, gələcəyin qurucularını vətənin tərəqqisi naminə daha böyük əzmkarlığa və fədakarlığa çağırmışdır.

Növbə ilə söz alan gənclər Azərbaycanın çiçəklənməsi yolunda bundan sonra da bütün qüvvə və bacarıqlarını sərf edəcəklərinə, daim vətənin mübariz əsgəri olacaqlarına söz vermişlər.

2005-ci ildə təhsildə, əməkdə və idmanda yüksək nailiyyət qazananlar gənclər və idman idarəsinin fəxri fərmanları ilə mükafatlandırılmışlar.

Tədbir bədii özfəaliyyət kollektivinin hazırladığı geniş bayram konserti ilə başa çatmışdır.

X X X

Salyanda Gənclər günü həyata keçirilən bir sıra rəngarəng tədbirlərlə yadda qalmışdır. Nizami Gəncəvi adına mərkəzi kitabxanada istedadlı yazarların şeir müsabiqəsi, əmək və müharibə veteranları ilə görüş keçirilmiş, Peşə liseyində dəyirmi masa, rəsm qalereyasında həvəskar rəssamların “Qış lövhələri” adlı sərgisi təşkil olunmuş, ümumrayon iməciliyində təmizlik və abadlıq işləri görülmüşdür.

Gənclərin toplantısında çıxış edən gənclər və idman idarəsinin rəisi Hüseynağa Hacıyev əsası ümummilli lider Heydər Əliyev tərəfindən qoyulmuş gənclər siyasətinin respublikamızın Prezidenti İlham Əliyev tərəfindən uğurla davam etdirildiyini nəzərə çarpdırmış, qazanılmış nailiyyətləri xatırladaraq perspektivlərdən söz açmışdır.

Rayon icra hakimiyyətinin başçısı Rasim Bəşirov gəncləri bayram münasibətilə təbrik etmiş, onlara müvəffəqiyyətlər arzulamışdır.

Digər natiqlər də dövlətçiliyimizin və müstəqilliyimizin daha da möhkəmlənməsi və qüdrətlənməsinə yardımçı olacaqlarına söz vermişlər.

Sonda təhsildə, istehsalatda və idmanda fərqlənmiş gənclərin bir qrupuna rayon icra hakimiyyətinin, gənclər və idman idarəsinin fəxri fərmanları, qiymətli hədiyyələr verilmişdir.

X X X

Saatlı gəncləri ulu öndər Heydər Əliyevin büstü önünə gül-çiçək dəstələri qoymuş, ümummilli liderin xatirəsini minnətdarlıqla yad etmişlər. Geniş toplantı keçirilmiş, gənclər və idman idarəsinin rəisi Elçin Qiyasovun hesabat məruzəsi dinlənilmişdir. O, ötən bir ildə görülmüş işlər barədə məlumat verərək demişdir ki, gənclər respublikamızın Prezidenti İlham Əliyevin həyata keçirdiyi daxili və xarici siyasəti tamamilə bəyənir və müdafiə edirlər. Məruzə ətrafında çıxış edən digər natiqlər də ölkəmizdə həyata keçirilən gənclər siyasətinin uğurlu nəticələrindən bəhs etmiş, qarşıda duran daha möhtəşəm vəzifələri layiqincə yerinə yetirməyə hazır olduqlarını bildirmişlər.

Rayon icra hakimiyyətinin başçısı Vaqif Hüseynov toplantı iştirakçılarını bayram münasibətilə təbrik etmiş, onlara yeni nailiyyətlər arzulamışdır.

Gənclər siyasətinin həyata keçirilməsində fərqlənənlər gənclər və idman idarəsinin mükafatları ilə təltif olunmuşdur.

Sonda maraqlı konsert proqramı nümayiş etdirilmişdir.

X X X

Neftçala, Biləsuvar, Sabirabad və Hacıqabul rayonlarında da Gənclər günü geniş qeyd olunmuşdur.