MƏDƏNİYYƏT
Gənc Tamaşaçılar Teatrında “Aycan” tamaşasının premyerası olub
Bakı, 17 dekabr, AZƏRTAC
Azərbaycan Dövlət Gənc Tamaşaçılar Teatrında tanınmış şair və dramaturq Xanımana Əlibəylinin “Aycan” əsəri əsasında hazırlanmış eyniadlı tamaşanın premyerası baş tutub.
AZƏRTAC xəbər verir ki, tamaşanın quruluşçu rejissoru, Əməkdar İncəsənət Xadimi Ağalar İdrisoğlu, quruluşçu rəssamı Olqa Şabanova, bəstəkarı Rüfət Ramazanov, rejissor assistenti Anar Seyfullayevdir.
Yeni səhnə əsərində rəqslərin quruluşu Yelena Volkovaya məxsusdur. Rolları teatrın gənc və istedadlı aktyorları Asya Atakişiyeva, İradə Rəşidova, Simuzər Ağakişiyeva, Zümrüd Quliyeva, Təhminə Məmmədova, Könül Əbilova, Gülbəniz Mustafayeva, Anar Seyfullayev və başqaları ifa ediblər.
Məlumat üçün bildirək ki, “Aycan” tamaşası ilk dəfə Gənc Tamaşaçılar Teatrında 70-ci illərdə səhnələşdirilib. Bundan başqa müəllifin “Dovşanın ad günü” əsəri əsasında hazırlanmış tamaşa cari ilin yanvar ayında ikinci dəfə hazırlanaraq teatrsevərlərə təqdim olunub.