Bakı, 14 iyul, AZƏRTAC

Gəncə şəhərində baş verən hadisələr respublikamızın bütün əhalisi kimi, biz ziyalıları, elm adamlarını da son dərəcədə hiddətləndirib. Çünki Azərbaycan Xalq Cümhuriyyətinin ilk paytaxtı olmuş bu qədim şəhərdə atılan güllələr hər hansı bir məmura deyil, Azərbaycanın dövlət müstəqilliyinə qarşı, ölkəmizdə əldə edilmiş siyasi sabitliyə, xalq-iqtidar birliyinin pozulmasına yönəldilmiş cəhddən başqa bir şey deyildir. Lakin bu qanlı terror hadisəsini törədənlərin və onların arxasında duran müəyyən qüvvələrin respublikamızda mövcud siyasi sabitliyi pozmaq, xalqla iqtidar arasında möhkəm birliyə zərbə vurmaq kimi qara niyyətləri baş tutmadı. Çünki xalqımız ağır məhrumiyyətlər və qurbanlar bahasına əldə etdiyi dövlət müstəqilliyini qanı və canı bahasına qorumağa hər an hazırdır.

Bu sözləri iyulun 10-da Gəncədə törədilən iğtişaşla bağlı AZƏRTAC-a açıqlama verən Azərbaycan Dövlət Pedaqoji Universitetinin Azərbaycan tarixi kafedrasının professoru, tarix üzrə elmlər doktoru Xəqani Məmmədov deyib.

X.Məmmədov bildirib ki, ulu öndərimiz Heydər Əliyevin siyasi varisi Prezident İlham Əliyevin həyata keçirdiyi məqsədyönlü daxili və xarici siyasət sayəsində ölkəmiz ildən-ilə inkişaf edir, xalqın güzəranı yaxşılaşır, yeni-yeni iş yerləri açılır, ölkənin müdafiə qabiliyyəti, ordumuzun peşəkarlıq səviyyəsi getdikcə yüksəlir. Xalqımızın ən ağrılı problemi olan Qarabağ probleminin həlli yolunda yürüdülən siyasət öz bəhrəsini verməkdədir. 2016-cı ilin Aprel döyüşlərində əldə edilmiş mühüm qələbə, bu ilin mayında Naxçıvan əməliyyatı zamanı 11 min kvadratkilometr ərazimizin erməni işğalçılarından azad edilməsi və Yerevan-Xankəndi yolunun ordumuzun nəzarəti altına keçməsi, Azərbaycan Ordusunun 100 illiyi münasibətilə keçirilən hərbi paradda ən müasir silahların nümayiş etdirilməsi xalqımızı sevindirir, Qarabağ probleminin tezliklə həll ediləcəyinə olan inamını daha da artırır. Əldə edilən uğurlarımız xain qonşularımızı narahat edir, bədxahlar, pisniyyətlilər ölkəmizdə qarışıqlıq salmağa, xalq-iqtidar birliyini, əldə edilmiş möhkəm siyasi sabitliyi pozmağa çalışırlar. Lakin onlar öz çirkin məqsədlərinə nail ola bilməyəcəklər. Çünki xalqımız artıq 1990-cı illərin əvvəllərindəki xalq deyildir. Müstəqillik illəri ərzində xalqımızın milli şüuru və milli özünüdərki xeyli inkişaf edib. Artıq xalq yaxşını pisdən ayırmağı bacarır. Xalq öz Prezidentinin ətrafında sıx birləşərək xalq-iqtidar birliyini, ictimai-siyasi sabitliyi pozmaq istəyən bədxah, mənfur qüvvələrin qarşısını polad sədd kimi almağa qadirdir.