İQTİSADİYYAT


Gömrük Komitəsinin jurnalistlər üçün təlimi başlayıb

Bakı, 13 mart, Elvin Camalov, AZƏRTAC

Martın 13-də Şəkidə Dövlət Gömrük Komitəsinin (DGK) media nümayəndələri üçün təşkil etdiyi “Gömrük islahatları: şəffaf gömrük, asan və sürətli ticarət” mövzusunda təlim başlayıb.

AZƏRTAC xəbər verir ki, təlimin açılış mərasimində DGK-nın Mətbuat və İctimaiyyətlə Əlaqələr İdarəsinin rəisi Natiq Axundov gömrük xidmətinin fəaliyyətinin işıqlandırılmasında medianın rolunu vurğulayıb və birgə əməkdaşlığın əhəmiyyətindən danışıb.

Komitənin Gömrük Tariflərinin Tənzimlənməsi və Ödənişlər Baş İdarəsinin rəisi, gömrük xidməti general-mayoru Mirqasım Vahabov ölkədə gömrük sahəsində əldə olunan uğurlardan, aparılan məqsədyönlü işlərdən, nəzərdə tutulan layihə və yeniliklərdən bəhs edib.

İdarə rəisi gömrük sistemində islahatlar haqqında ətraflı məlumat verib. Vurğulayıb ki, Prezident İlham Əliyev tərəfindən Dövlət Gömrük Komitəsinin qarşısında mühüm vəzifələr qoyulub. Əsas məqsəd şəffaflığın təmin olunması, gömrük-biznes münasibətlərinin daha da gücləndirilməsi, ölkənin ixrac və tranzit potensialının artırılması, beynəlxalq ticarətin asan və sürətli şəkildə həyata keçirilməsinə nail olmaqdır.

Mi.Vahabov qeyd edib ki, bu il fevralın 1-dən tətbiq edilən “Yaşıl dəhliz” buraxılış sistemi vaxt və əlavə vəsait itkisinin aradan qaldırılmasına, idxal-ixrac əməliyyatlarının maneəsiz və asan şəkildə həyata keçirilməsinə, vətəndaş-məmur təmasının minimuma endirilməsinə şərait yaradıb.

“İslahatların uğurla reallaşdırılması onların mahiyyətinin ictimaiyyətə doğru və operativ şəkildə çatdırılmasından asılıdır” - deyən idarə rəisi bu istiqamətdə gömrük-media münasibətlərinin rolunu da vurğulayıb. Gömrük orqanlarının media ilə səmərəli və işgüzar münasibətlərə önəm verdiyini bildirən M.Vahabov bu təlimin gömrük sistemində tətbiq edilən yeniliklərin təbliğində əhəmiyyətli rol oynayacağına əminliyini ifadə edib.

Təlimdə DGK-nın Gömrük Sərhəd Buraxılış Məntəqələrinin İşinin Təşkili Baş İdarəsinin sərnişin dəhlizlərinin idarə olunması şöbəsinin rəisi Vasif Qurbanov “Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş Qaydaları”na dair Nazirlər Kabinetinin müvafiq Qərarı, Gömrük Risklərinin İdarə Olunması və Audit Baş İdarəsinin böyük inspektoru Orxan Vahabov “Gömrük işinin təşkilində risk meyarı. Risklərin analizi sisteminin tətbiqi və əldə edilən nəticələr”, Gömrük Nəzarətinin Təşkili və Ticarətin Asanlaşdırılması Baş İdarəsinin baş inspektoru Ələkbər Heydərov “Yaşıl dəhliz” buraxılış sistemi və ticarətin asanlaşdırılması” mövzusunda təqdimatlarla çıxış ediblər.

Təlim martın 15-dək davam edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.