Bakı, 8 noyabr, AZƏRTAC

Noyabrın 7-8-də Dini Qurumlarla İş üzrə Dövlət Komitəsi (DQİDK) və Göyçay Rayon İcra Hakimiyyətinin (RİH) birgə təşkilatçılığı ilə “Azərbaycanda dövlət-din münasibətləri: tarix və müasirlik” mövzusunda seminar-müşavirə keçirilib.

Dini Qurumlarla İş üzrə Dövlət Komitəsinin mətbuat xidmətindən AZƏRTAC-a bildiriblər ki, din xadimlərinin, dini icma sədrlərinin, gənclərin və ictimaiyyətin digər nümayəndələrinin iştirak etdikləri seminar-müşavirədə Göyçay RİH başçısı Aparatının İctimai-siyasi məsələlər şöbəsinin müdir müavini-dini qurumlarla işin təşkilatçısı Vüsal Zöhrabov dini radikalizmin cəmiyyət üçün təhlükəli olduğunu bildirib. Qeyd edib ki, gənclərin yad dini ideologiyaların təsirindən qorunmasında dini maarifləndirmə tədbirləri mühüm rola malikdir. Diqqətə çatdırıb ki, gənclərin milli-mənəvi və ümumbəşəri dəyərlər ruhunda tərbiyə olunması olduqca vacibdir.

Göyçaydakı dini durum barədə də məlumat verən V.Zöhrabov deyib ki, rayonda bu sahədə vəziyyət sabitdir və bütün məzhəblərin nümayəndələri sülh, qardaşlıq şəraitində yaşayırlar.

Sonra çıxış edən DQİDK sədrinin birinci müavini Səyyad Salahlı bildirib ki, Şərqlə Qərb arasında mədəniyyətlər və ideyalar ortaqlığı yaradan, həmrəylik körpüsü funksiyasını yerinə yetirən Azərbaycan bununla həm ümumbəşəri dəyərlərə bağlılığını, həm də tarixi keçmişində xüsusi yer tutan və bu gün də qoruyub saxladığı İslam dininin ali dəyərlərinə sadiqliyini sübut edir. Ölkəmiz qloballaşan dünyada davamlı sabitliyin bərqərar olması üçün bütün vasitələrdən istifadə edir, günümüz üçün zəruri sayılan sülhyaradıcı və barışdırıcı mövqeyini özünəməxsus formada irəli sürür.

Vəhdətin, ortaq dəyərlərin təbliğinin önəmindən bəhs edən sədrin birinci müavini vurğulayıb ki, bunlar dövlətlərin varlığını qoruyub saxlayan əsas amillərdir. Bu dəyərlərdən məhrum ölkələrdə əmin-amanlıq olmadığı kimi, onların gələcəyi də sual altındadır. Buna görə də təfriqəyə yol açan, milli-dini birliyə yönəlmiş mənfi fikir və ideyaların yayılmasının qarşısı alınmalıdır. Bakıdakı Heydər məscidində məzhəbindən asılı olmayaraq, bütün müsəlmanların ilk dəfə bir araya gələrək eyni vaxtda, bir yerdə, bir sırada vəhdət namazı qıldığını xatırladan S.Salahlı bu təşəbbüsün böyük dəstək qazanaraq davamlı hal aldığını deyib.

Səyyad Salahlı dünyada sünni-şiə məsələsinin məqsədyönlü şəkildə qabardıldığı bir zamanda Astara rayonunun Pensər kəndindəki hər iki məsciddə bütün cümə namazlarının hər məsciddə bir dəfə olmaqla vəhdət şəklində qılınmasını ölkəmizdə dövlət tərəfindən həyata keçirilən tolerantlıq və multikulturalizm siyasətinin bariz nümunəsi kimi dəyərləndirib. Bildirib ki, DQİDK-nın tabeliyindəki Mənəvi Dəyərlərin Təbliği Fondunun təşkilatçılığı ilə “Vəhdət dəyərimizdir” layihəsi çərçivəsində Zaqatala, Oğuz, Gəncə, Lənkəranda birgə namazların qılınması mövcud vəhdət ənənələrinin güclənməsinə böyük töhfə verir.

İslam dünyasında vəhdət, birlik və həmrəylik prinsiplərinə nail olmaq üçün, ilk növbədə, din xadimlərinin güclü səylə çalışmalı olduqlarını vurğulayan Səyyad Salahlı onları bu işdə fəal olmağa, İslam cəmiyyətinin vəhdət prinsiplərinin formalaşması və inkişafı yolunda əhəmiyyətli addımlar atmağa səsləyib.

DQİDK-nın Dini maarifləndirmə işinin təşkili şöbəsinin əməkdaşı Tural Vəlizadə radikalizm və ekstremizmin yayılması və gəncləri öz təsiri altına almasının qarşısının alınması üçün dini maarifləndirmə tədbirlərinin əhəmiyyətinə diqqət çəkib. Bildirib ki, İslamın insanlara düzgün şəkildə çatdırılması vacibdir.

Sonra Dövlət Komitəsinin sifarişi ilə çəkilən “Üfüqdəki gələcək” filmi nümayiş olunub

İkigünlük seminar-müşavirə iştirakçıların suallarının cavablandırılması ilə yekunlaşıb.