CƏMİYYƏT
Hərbi ekspert: Ötən 27 ildə Azərbaycanın NATO ilə əməkdaşlığı nəticəsində mühüm nailiyyətlər qazanılıb
Bakı, 4 may, AZƏRTAC
Keçmiş SSRİ-nin süqutundan sonra “Varşava paktı”na daxil olan bir sıra dövlətlər “Soyuq müharibə”nin aradan qalxması ilə NATO-ya üzvlük istiqamətində müəyyən addımlar atmağa başladı. Bu addımları nəzərə alan ABŞ 1994-cü ilin yanvarında NATO-nun Brüsseldə keçirilmiş toplantısında “Sülh Naminə Tərəfdaşlıq” Proqramını təqdim etdi. Azərbaycan Respublikası bundan qısa müddət sonra - 1994-cü il mayın 4-də bu proqrama qoşuldu. Ötən 27 ildə Azərbaycanın NATO ilə davam edən əməkdaşlığı nəticəsində mühüm nailiyyətlər qazanılıb.
Bu sözləri hərbi ekspert Ədalət Verdiyev AZƏRTAC-a açıqlamasında deyib.
Hərbi ekspert qeyd edib ki, proqramın yaranmasından beş ay sonra Azərbaycan bu proqram çərçivəsində keçirilən tədbirlərdə iştirak edərək ölkəmizin Şimali Atlantika məkanına inteqrasiyası istiqamətində mühüm addımlar atdı. Azərbaycan Silahlı Qüvvələrinin nümayəndələri hazırda NATO-nun “Sülh Naminə Tərəfdaşlıq” Proqramı çərçivəsində vaxtaşırı olaraq müxtəlif ölkələrdə keçirilən tədbirlərdə və layihələrdə uğurla, eləcə də fəal iştirak edir. “Mən özüm də bir neçə dəfə bu proqramın iştirakçısı olmuşam. Düşünürəm ki, bu proqramda iştirak etmək Azərbaycan Silahlı Qüvvələrinin gələcək inkişafı üçün mühüm əhəmiyyət daşıyır”, - deyə ekspert vurğulayıb.
Ədalət Verdiyev bildirib ki, Azərbaycanın NATO və ABŞ ilə uğurlu əməkdaşlığının bariz nümunələrindən biri də ölkəmizin Əfqanıstandakı sülhməramlı missiyada iştirakıdır. Bundan başqa Azərbaycan hava məkanından istifadə imkanı təqdim etməklə ABŞ-ın Əfqanıstandakı qoşunlarının təminat və təchizatında ən mühüm rol oynayan ölkələrdən biridir. Birləşmiş Ştatlar da Azərbaycanın Əfqanıstanda sülhməramlı missiyada iştirakını yüksək qiymətləndirib. ABŞ dövlət katibi Entoni Blinkenin bu yaxınlarda Prezident İlham Əliyevlə telefon söhbətində bu fakt bir daha təsdiqini tapdı.
“Azərbaycan müasir və güclü orduya malikdir, Ordumuz regionda sabitliyin və sülhün möhkəmlənməsinə xidmət edir. Başqa sözlə desək, Azərbaycanın regionda ABŞ ilə birlikdə sabitliyin və sülhün möhkəmləndirilməsində birgə fəaliyyət göstərə biləcəyi bir daha təsdiqlənir. Hesab edirəm ki, Azərbaycan həm NATO, həm də ABŞ ilə gələcəkdə bu istiqamətdə əməkdaşlığı hərtərəfli inkişaf etdirməkdə maraqlıdır”, - deyə həmsöhbətimiz əlavə edib.