Bakı, 10 aprel, AZƏRTAC

Hərraclar biznes mühitində olmaq istəyənlərə geniş imkanlar yaradır. Belə ki, özəlləşdirməyə müxtəlif çeşiddə və münasib qiymətə dövlət əmlakları çıxarılır. Bu isə hər bir sərmayəçinin biznes layihələrinə uyğun olaraq əmlak sahibi olmasına şərait yaradır. Belə üstünlüklərlə yanaşı, artıq özəlləşdirilmə prosesinin keçirildiyi məkana gəlməklə bağlı investorların zamanını planlaşdırmağa da ehtiyac qalmır. Belə ki, funksionallığı ilə seçilən Elektron hərracın tətbiqi bu məsələni tam olaraq həll edib. Sistem məkan və zaman məfhumunu aradan qaldırıb. İstənilən şəxs ölkə daxilində və ya xaricində istənilən vaxt müraciət edərək tamamilə elektron şəkildə hərraca qatılmaq hüququ əldə edir.

Əmlak Məsələləri Dövlət Komitəsindən AZƏRTAC-a bildirilib ki, komitə aprelin 10-da keçirilən növbəti hərracda da investorlar belə üstünlüklərdən yararlanıb. Növbəti hərracda 1 kiçik dövlət müəssisəsi, 6 qeyri-yaşayış sahəsi, 8 nəqliyyat vasitəsi özəlləşdirilib.

Hərraclara çıxarılan əmlakların əlverişli olması, iştirak prosedurlarının sadə olması sərmayəçilərin marağını artırıb. Özəlləşdirlmə prosesinin sadalanan müsbət cəhətlər alıcıların sayını artırmaqla budəfəki hərracda da rəqabət yaradıb. Belə ki, “Hyundai Sonata” markalı avtomobilə edilən təkliflər ard-arda səslənib. İlkin start qiyməti 8 min 500 manat olan bu maşına ən son 18 min 200 manat təklif edilib. 2007-ci ilin istehsalı olan digər “Hyundai Sonata”nın hərracında da alıcıların fəallığı müşahidə edilib. Həmin avtomobilin ilkin start qiyməti 7 min 500 manat olsa da, edilən təklif 12 min manata qədər yüksəlib. Eyni tendensiya “VAZ-21041” markalı avtomobilin hərracında da müşahidə edilib. Belə ki, ilkin start qiyməti 1600 manat olan maşın 2 min 400 manata sahibini tapıb. “QAZ-3110” markalı nəqliyyat vasitəsinin hərracında isə ən son 2 min 600 manat təklif edən iştirakçı qalib olub. Qeyd edək ki, həmin avtomobilin ilkin start qiyməti 1300 manat olub. Ümumilikdə özəlləşdirilən nəqliyyat vasitələri sırasında Avropa istehsalı olan avtomobillər üstünlük təşkil edib. Həmin maşınların buraxılış tarixi 1987-2008-ci illəri əhatə edir.

Bakı şəhəri üzrə keçirilən hərraclarda 2 istifadəsiz qeyri-yaşayış sahəsi və 8 nəqliyyat vasitəsi, respublikanın digər şəhər və rayonları üzrə 1 kiçik dövlət müəssisəsi və 4 istifadəsiz qeyri-yaşayış sahəsi özəlləşdirilib.

Hərracda özəlləşdirilən kiçik dövlət müəssisəsi Astara rayonunda yerləşən qeyri-yaşayış binasıdır. Həmin əmlak xidmət sahəsində əlverişli olmaqla sahibinə yaxşı gəlir gətirə bilər. Belə ki, ümumi faydalı sahəsi 326 kvadratmetr, torpaq sahəsi 700 kvadratmetr olan obyekt geyim mallarının pərakəndə satışı üçün əlverişlidir.

Bakı şəhəri üzrə özəlləşdirilən qeyri-yaşayış sahəsi Xətai və Pirallahı rayonlarında yerləşir. Region üzrə özəlləşdirilən qeyri-yaşayış sahəsi isə Abşeron və Yevlax rayonlarındadır. Xətai rayonunda yerləşən, ümumi faydalı sahəsi 32,5 kvadratmetr olan əmlakdan ofis, xidmət obyekti kimi istifadə etmək olar. Pirallahıda yerləşən ümumi faydalı sahəsi 361 kvadratmetr olan obyekt də xidmət sahəsinə aid olmaqla investorlar üçün yaxşı gəlir mənbəyidir.

Keçirilən hərracların nəticələri ilə tanış olmaq üçün komitənin rəsmi saytı olan “emdk.gov.az” və “privatization.az” portallarının müvafiq bölməsinə daxil olmaq kifayətdir.

Hərraca qatılmaq üçün Özəlləşdirmə portalı üzərindən əmlakı seçib sifariş vermək kifayət edir. Portalda hər bir əmlakın mövqeyi, yerləşməsi, mövcud vəziyyəti barədə fotoşəkillər və mətn məlumatları var. İstənilən şəxs hərracda həm iştirakçı qismində qatıla, həm də ziyarətçi olaraq canlı izləyə bilər.

Qeyd edək ki, Əmlak Məsələləri Dövlət Komitəsi tərəfindən növbəti hərrac aprelin 17-də keçiriləcək. Hərraca investorları cəlb edə biləcək çoxçeşidli əmlaklar çıxarılıb.