Bakı, 10 aprel, AZƏRTAC

Hesablama Palatasının əməkdaşıları ASOSAI (Ali Audit Qurumlarının Avropa Təşkilatı) təşkilatı tərəfindən təşkil edilmiş "İnformasiya texnologiyalarının auditi" mövzusunda və 2018-2019-cu illəri əhatə edən beynəlxalq təlim proqramını tamamlayıb.

Palatanın mətbuat xidmətindən AZƏRTAC-a bildirilib ki, təlim proqramı nəzəri və praktiki hissələrdən ibarət idi. 2018-ci ilin fevral ayından başlayaraq 9 həftə davam etmiş nəzəri hissə məsafədən elektron təlim aləti vasitəsilə keçirilib. Bu hissədə Asiya regionuna aid ali audit qurumunun 70-dən artıq təmsilçisi iştirak edib. Hər bir ali audit qurumları heyəti 7 modul üzrə hazırlıqlardan keçib. Bunlar aşağıdakılardır: Modul 1 - audit zamanı informasiya texnologiyalarının tətbiqi, daxili nəzarət sistemi və əlaqəli risklər ilə tanışlıq; Modul 2 - IT auditi prosesi və audit planlaşdırması matrisi; Modul 3 - IT idarəçiliyi; Modul 4 - IT satınalması və hazırlanması; Modul 5 - IT əməliyyatları, saxlanma və dəstək; Modul 6 - "Big Data" və məlumat təhlili ilə tanışlıq; Modul 7 - Audit planının hazırlanması.

Hesablama Palatasının heyəti qeyd edilən modullar üzrə təlimi bitirib və təşkilatçılar tərəfindən aparılmış qiymətləndirmə əsasında növbəti mərhələyə keçməyə müvəffəq olub. Təlim proqramının növbəti mərhələsi olaraq pilot IT auditinin aparılması nəzərdə tutulub.

Bununla əlaqədar heyət üzvləri tərəfindən risk qiymətləndirilməsi əsasında audit olunmalı qurum və orada istifadə edilən informasiya sistemi seçilib. Daha sonra müvafiq audit planı hazırlanıb və onun xarici həmkarlarla müzakirəsi üçün Hesablama Palatasının heyəti ötən il iyulun 2-6-da Türkiyə Hesablama Məhkəməsinin ev sahibliyi ilə Ankarada keçirilmiş görüşdə iştirak edib. Görüş zamanı hər bir audit planı həmkar təşkilat təmsilçisi tərəfindən nəzərdən keçirilib və yekun planlar üzrə pilot auditlərin aparılması qərara alınıb.

Təlim proqramının sonuncu mərhələsində keçirilmiş pilot auditlərin nəticələrinin müzakirəsi nəzərdə tutulub. Bu məqsədlə bu il aprelin 1-5-də Banqkokda hər bir ölkənin ali audit qurumunun audit heyətlərinin rəhbərlərinin regional görüşü keçirilib. Taylandın Dövlət Auditi Ofisinin ev sahibliyi ilə keçirilmiş görüşdə 25-ə yaxın ölkə təmsil olunub. Azərbaycan Respublikası Hesablama Palatasının təmsilçisi daxil olmaqla bütün iştirakçılar keçirilmiş auditlər və onların nəticələri barədə məlumat verib.

Görüşdə informasiya texnologiyalarının auditinin keçirilməsi zamanı rast gəlinən çətinliklər və onlarla bağlı çıxış yolları müzakirə edilib. Bundan əlavə, müasir dövrdə audit fəaliyyəti çərçivəsində məlumatların təhlili texnikaları, irihəcmli məlumatlardan ("Big Data") istifadə üsulları, məlumatların təhlilində vizuallaşma və sair məsələlər ətrafında fikir və təcrübə mübadiləsi aparılıb.

ASOSAI təşkilatının Potensialın Artırılması Proqramının dəstəyi ilə keçirilmiş təlim proqramının yekununda iştirakçılar "IT auditi" üzrə beynəlxalq sertifikatlar ilə təltif olunub.

Qeyd edək ki, təlim proqramı ilk dəfə olaraq təsvir edilmiş formatda keçirilib və bu təşəbbüsün uğurlu nəticəsini nəzərə alaraq ASOSAI-ın idarə heyəti tərəfindən ikinci təlim proqramına start verilməsi qərara alınıb. Yeni proqramın "Dayanıqlı inkişaf məqsədlərinin auditi" mövzusunu əhatə edəcəyi gözlənilir.