MƏDƏNİYYƏT
ICOM Azərbaycan Milli Komitəsi beynəlxalq forum və regional seminarda təmsil olunub
Bakı, 5 iyul, AZƏRTAC
Azərbaycan Xalça Muzeyi Gürcüstanın paytaxtı Tbilisidə keçirilən “Cəmiyyətin davamlı inkişafı üçün muzeylər” mövzusunda beynəlxalq forum və regional seminarda təmsil olunub.
Xalça Muzeyindən AZƏRTAC-a bildirilib ki, tədbir ICOM Gürcüstan Milli Komitəsi, ICOM Avropa Alyansı, Gürcüstan Muzeylər Assosiasiyasının təşkilatçılığı, ICOM Azərbaycan Milli Komitəsi, Gürcüstan Mədəniyyət və İdman Nazirliyi, Gürcüstan Mədəni İrsin Qorunması üzrə Milli Agentlik, Gürcüstan Milli Muzeyinin dəstəyi ilə “2018 - Avropa mədəni irs ili” çərçivəsində keçirilib.
Forumda ICOM-un prezidenti Dr Suay Aksoy, ICOM Avropa Alyansının prezidenti Dr Luis Raposo, Avropa Muzeylər Təşkilatları Şəbəkəsinin (NEMO) baş katibi Julia Pagel, ICOM İanə Fondunun icraçı direktoru (ICOM Endowment Fund) Byorn Stenvers, “Creativity Lab” təşkilatının idarə heyətinin üzvü Ragnar Siil, Gürcüstan Milli Muzeyinin baş direktoru David Lordkipanizde, ICOM Gürcüstan Milli Komitəsinin sədri İnqa Karaia, ICOM Azərbaycan Milli Komitəsinin sədri, Azərbaycan Xalça Muzeyinin direktoru Şirin Məlikova və digər iştirakçılar çıxış ediblər.
Şirin Məlikova forumda “Muzey sahəsi: inkişafın dinamikası” (Museum Sphere: Dynamics of Development) adlı məruzə ilə çıxış edib. Xalça Muzeyinin direktoru öz çıxışında ölkəmizin aparıcı iri muzeylərinin, o cümlədən Heydər Əliyev Mərkəzi, Azərbaycan Xalça Muzeyi, Azərbaycan Milli İncəsənət Muzeyi, “İçərişəhər” Dövlət-Tarix Memarlıq Qoruğu, Azərbaycan Musiqi Mədəniyyəti Dövlət Muzeyinin fəaliyyəti və həyata keçirdiyi yeni layihələr, ictimaiyyətin həyatında muzeylərin rolundan bəhs edib. Şirin Məlikova müasir dövrümüzdə muzeylərin cəmiyyətdə oynadığı roldan danışıb. Xalça Muzeyinin fəaliyyətinə diqqət çəkən muzeyin direktoru bu mədəniyyət ocağının tarixindən, fəaliyyətindən, həyata keçirilən layihələrdən söz açıb.
Şirin Məlikova bu il 18 may - Beynəlxalq Muzeylər Günü münasibətilə ICOM Azərbaycan Milli Komitəsinin təşəbbüsü ilə hazırlanan və ölkə muzeyləri tərəfindən keçirilən tədbirlərdən bəhs edən videoçarxı da nümayiş etdirib.
Qeyd edək ki, forum çərçivəsində təşkil olunmuş seminarda Azərbaycan Xalça Muzeyi, Heydər Əliyev Mərkəzi və “İçərişəhər” Dövlət-Tarix Memarlıq Qoruğunun gənc əməkdaşları da iştirak ediblər.