RƏSMİ SƏNƏDLƏR
İKİ MÜQƏDDƏS OCAĞIN XADİMİ, SƏUDİYYƏ ƏRƏBİSTANININ KRALI ƏLAHƏZRƏT ABDULLAH BİN ƏBDÜLƏZİZ AL SƏUDA
Əlahəzrət,
Səudiyyə Ərəbistanının milli bayramı – Krallıq elan edilməsi günü münasibətilə Sizi salamlayır, Sizin simanızda bütün dost xalqınızı şəxsən öz adımdan və Azərbaycan xalqı adından səmimi qəlbdən təbrik edirəm.
Azərbaycan ilə Səudiyyə Ərəbistanı arasında dostluq münasibətlərinin bugünkü səviyyəsi məmnunluq doğurur. Ümidvaram ki, əlaqələrimizin daha da genişlənməsi, əməkdaşlığımızın hərtərəfli inkişafı üçün bundan sonra da ardıcıl səylər göstərəcəyik.
Bu əlamətdar gündə Sizə ən xoş arzularımı yetirir, dost Səudiyyə Ərəbistanı xalqına əmin-amanlıq və firavanlıq diləyirəm.
Hörmətlə,
İlham Əliyev
Azərbaycan Respublikasının Prezidenti
Bakı, 5 sentyabr 2005-ci il.