Bakı, 2 avqust, AZƏRTAC

İlin birinci yarısında investisiya qiymətli kağızları bazarında ümumilikdə 8 milyard 176,3 milyon manat həcmində əməliyyat aparılıb.

Maliyyə Bazarlarına Nəzarət Palatasından AZƏRTAC-a bildirilib ki, bazarın həcmi keçən ilin müvafiq dövrü ilə müqayisədə 8 faiz artıb. Əməliyyatların 85 faizi (6 milyard 957,5 milyon manat) ilkin bazarda, 15 faizi (1 milyard 218,8 milyon manat) isə təkrar bazarda aparılıb. Cari ilin yanvar-iyun aylarında qiymətli kağızlarla ilkin bazar əməliyyatları ötən ilin müvafiq dövrü ilə müqayisədə 7 faiz, təkrar bazar əməliyyatları isə 11 faiz artıb.

Hesabat dövründə real sektor təmsilçilərinin və maliyyə institutlarının fond bazarı vasitəsilə öz vəsaitlərini artırmaq təşəbbüsləri korporativ qiymətli kağızlar bazarının korporativ istiqrazlar seqmentində əməliyyatların həcminin ötən ilin müvafiq dövrü ilə müqayisədə 74 faiz (756 milyon manat) artmasına səbəb olub. Əlavə olaraq, korporativ istiqrazların ilkin bazarında bağlanan əqdlərin məbləği əvvəlki hesabat dövrü ilə müqayisədə 3,3 dəfə artaraq 470 milyon manata çatıb. Ümumilikdə, korporativ qiymətli kağızların ilkin bazarında 19 faiz artım müşahidə olunub.

Dövlət qiymətli kağızları bazarında əqdlərin həcmi ötən illə müqayisədə 11 faiz artaraq 6 milyard 656 milyon manat təşkil edib ki, bunun 520 milyon manatı dövlət istiqrazları, 6 milyard 135,5 milyon manatı isə Mərkəzi Bankın notlarının payına düşüb. Dövr ərzində dövlət istiqrazlarının yerləşdirilməsi üzrə 17 hərrac, Mərkəzi Bankın notlarının yerləşdirilməsi üzrə isə 26 hərrac keçirilib, müvafiq olaraq, 325 milyon manat və 5 milyard 951 milyon manat məbləğində yerləşdirmə olub.

Altı ayda qiymətli kağızlarla keçirilən repo əməliyyatlarının ümumi məbləği 437,8 milyon manat olub. Dövlət istiqrazları ilə repo əməliyyatların həcmi ötən ilin müvafiq dövrü ilə müqayisədə artım nümayiş etdirərək 266 milyon manat təşkil edib.

Qeyd edək ki, ötən dövrlərin hesabatında əks olunmuş fərq müqavilələri ilə marja ticarəti əməliyyatları üzrə statistik məlumatlar bu hesabatlığa daxil edilməyib.