İsmayıllı, 11 sentyabr, AZƏRTAC

Vətən müharibəsində qəhrəmancasına döyüşərək şəhid olan Vüsal Dəmirovun xatirəsi doğum günündə uyuduğu İsmayıllı rayonundakı Şəhidlər xiyabanında, məzarı yanında yad edilib.

AZƏRTAC-ın bölgə müxbir xəbər verir ki, anım mərasimində şəhidin doğmaları, rayon icra hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin İsmayıllı rayon şöbəsinin, gənclər və idman idarəsinin məsul işçıləri, döyüş yoldaşları iştirak ediblər. Şəhidin xatirəsi ehtiramla anılıb, məzarı önünə əklil və gül dəstələri düzülüb, ruhuna dualar oxunub.

Mərasimdə çıxış edən rayon icra hakimiyyətinin başçısı Nahid Bağırov 44 günlük Vətən müharibəsində Prezident, Ali Baş Komandan İlham Əliyevin rəhbərliyi, əsgər və zabitlərimizin qəhrəmanlığı ilə qazanılan qələbənin tarixi əhəmiyyətindən danışıb. Vurğulayıb ki, 30 illik Vətən həsrətinə son qoyan Vüsal və onun kimi şəhid oğullarımızın xatirəsi gələcək nəsillərə örnək olacaq.

Çıxışlarda şəhidin keçdiyi qısa və mənalı həyat yolundan danışılıb. Bildirilib ki, Vüsal Aydın oğlu Daşdəmirov 1993-cü ilin sentyabrında İsmayıllıda anadan olub. Vətən müharibəsi başlayanda müddətdən artıq hərbi xidmətdə olan Vüsal gizir kimi döyüşlərə qatılıb. Müxtəlif cəbhələrdə vuruşan Vüsal oktyabrın 5-də Füzuli uğrundakı döyüşlərdə qəhrəmancasına şəhid olub. Hazırda İsmayıllıdakı Şəhidlər xiyabanında uyuyur. Ölümündən sonra Prezidentin Sərəncamı ilə “Vətən uğrunda”, “Füzulinin azad olunmasına görə”, “Xocavəndin azad olunmasına görə” medalları ilə təltif olunub.

Sonra İsmayıllı Olimpiya-İdman Kompleksində şəhid Vüsal Dəmirovun xatirəsinə həsr olunan yeniyetmə və azyaşlılar arasında cüdo üzrə açıq rayon birinciliyində qalib gələn idmançıların təqdimat mərasimi keçirilib. Öncə Dövlət Himni səsləndirilib, şəhidlərin xatirəsi bir dəqiqəlik sükutla yad edilib. Tədbirdə çıxış edənlər Vüsal Dəmirovun uzun illər cüdo idman növü üzrə məşğul olduğunu və onun uğurlarını qeyd ediblər. Sonda qaliblərə diplom və medallar verilib.

Anım mərasimi şəhidin doğulduğu evdə davam edib. Rayon rəhbərliyi şəhidin xatirəsinə hazırlanan guşə ilə tanış olublar. Burada İ.Həsənov adına şəhər 1 nömrəli tam orta məktəbin şagirdləri şəhidlərə, Vətənə həsr edilən şeirlər söyləyiblər.

Şəhidin valideyni onlara göstərilən diqqət və qayğıya görə dövlət başçısına minnətdarlığını bildirib.