DÜNYA


İsveç hökuməti atmosferə tullantıları sıfıra endirmək səylərini artırmaq niyyətindədir

Stokholm, 12 sentyabr, AZƏRTAC

İsveç hökuməti atmosferə tullantılara qarşı mübarizəni gücləndirməyi planlaşdırır.

AZƏRTAC İsveç hökumətinin dəftərxanası tərəfindən yayılmış press-relizə istinadla xəbər verir ki, bu məqsədlə sənaye və nəqliyyat sektorlarında “yaşıl texnologiyalar”a investisiyaları artırmaq təklif edilir. Bununla əlaqədar, İsveç hökuməti, Mərkəzçi Partiya və Liberal Partiya arasında saziş əsasında yeni büdcə qanunu layihəsi tərtib edilib.

Qanun layihəsi çərçivəsində belə adlandırılan “yaşıl sənaye sıçrayışı” proqramı təsvir edilir. Bu proqrama görə sənaye sektorunda tullantıları texnoloji nailiyyətlər hesabına sıfıra endirməyin dəstəklənməsi nəzərdə tutulur. Hökumətdə bildirirlər ki, əgər İsveç 2045-ci ilə qədər atmosferə tullantılara sıfıra endirmək hədəfinə nail olmaq istəyirsə, bu proqramın həyata keçirilməsi zəruridir. Qazıntı şəklində yanacaqdan “yaşıl yanacağa” keçidi dəstəkləmək üçün hökumət sənayedə ekoloji vəziyyəti 2019-cu ildəki vəziyyətlə müqayisədə sürətlə yaxşılaşdırmağı təklif edir. 2018-ci ildə dövlət yardımı kimi büdcə ayırmalarının məbləği 300 milyon İsveç kronu (28,14 milyon avro) olduğu halda 2020-ci ildə bu göstəricini ikiqat artıraraq 600 milyon İsveç kronuna (56,28 milyon avro) çatdırmaq nəzərdə tutulur.

İsveçin Ətraf Mühit və İqlim naziri, eyni zamanda, Baş Nazirin müavini olan İzabella Lyovin deyib: “İqlim dəyişmələrinə qarşı mübarizədə İsveçin lider ölkəyə çevrilməsi üçün nadir imkan yaranıb. Biz bu imkandan istifadə etməliyik. “Yaşıl sənaye sıçrayışı” proqramının köməyi ilə biz lider rolunda çıxış edirik və qazıntı şəklində enerji ehtiyatlarından istifadə edilmədən dünyada ilk sosial rifah ölkəsinə çevrilmək yolunu göstəririk. Bu yol başqa ölkələri də ruhlandırır”.

Hökumətin “İqlim sıçrayışı” adlı digər investisiya proqramı çərçivəsində İsveçdə 3200-dən çox layihə üçün vəsait təqdim ediləcək. İsveç Ətraf Mühitin Mühafizəsi Agentliyinin proqnozlarına görə, bu proqramın həyata keçirilməsi atmosferə tullantıların hər il 1,45 milyon tondan çox karbon qazına ekvivalent həcmdə azalmasına gətirib çıxaracaq. İsveç hökuməti iqlimlə bağlı investisiyalar üçün əlavə olaraq 1,16 milyard İsveç kronu məbləğində vəsait ayrılmasını təklif edir. Bu o deməkdir ki, 2020-ci ildə həmin vəsaitin həcmi təqribən 2 milyard İsveç kronuna (186 milyon avroya) bərabər olacaq.

İsveç hökuməti 2030-cu ilə qədər nəqliyyatdan (aviasiya istisna olmaqla) parnik qazları tullantılarını ən azı 70 faiz azaltmaq məqsədilə nəqliyyat vasitələri parkında tullantıların aşağı səviyyədə olduğu avtomobillərə, o cümlədən elektromobillərə keçidi sürətləndirməyin zəruri olduğunu bəyan edib.

Rauf Əliyev

AZƏRTAC-ın xüsusi müxbiri

Stokholm

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.