MƏDƏNİYYƏT
Kamran Şahmərdan: Mən bu günü ömür boyu gözləmişəm VİDEO
Bakı, 21 oktyabr, AZƏRTAC
Mənim üçün böyük səadətdir ki, filmimin premyerasını doğma Bakıda keçirirəm. Mən bu günü ömür boyu gözləmişəm. Fəxr edirəm ki, Elçin Əfəndiyev kimi görkəmli yazıçının əsərinə ekran həyatı vermişəm. “Qatil” pyesi əsasında hazırlanmış tamaşa 3-4 il bundan əvvəl Sankt-Peterburqda səhnəyə qoyulub və böyük maraq doğurub. Elə o vaxtdan Elçin müəllimin həmin əsərini ekranlaşdırmaq barədə düşünürdüm. Bu arzuma çatdığım üçün çox xoşbəxtəm.
Xalq Yazıçısı Elçin Əfəndiyevin pyesi əsasında çəkilmiş eyniadlı filmin baş rejissoru Kamran Şahmərdanın premyeradan əvvəl dediyi bu səmimi sözlər çoxsaylı tamaşaçılar tərəfindən hərarətlə qarşılandı.
AZƏRTAC xəbər verir ki, “Qatil” bədii filminin oktyabrın 21-də Nizami Kino Mərkəzində keçirilən təqdimat mərasimində dövlət və hökumət rəsmiləri, Milli Məclisin deputatları, elm və mədəniyyət xadimləri, ziyalılar, ictimaiyyət nümayəndələri iştirak edirdilər.
Mədəniyyət və Turizm Nazirliyinin sifarişi ilə ekranlaşdırılan film C.Cabbarlı adına “Azərbaycanfilm” kinostudiyasında Finlandiyanın “Black and White Studio”, Gürcüstanın “Studio 33A” və “Vars Studio” şirkətlərinin iştirakı ilə çəkilib.
Filmin ssenari müəllifi Xalq Yazıçısı Elçin Əfəndiyev, quruluşçu operatoru Mixail Maqalaşvili, quruluşçu rəssamı Rəşad Mehdiyev, icraçı prodüserləri Azər Quliyev və Katri Zətt, prodüseri Müşfiq Hətəmovdur. Baş rolları gürcü aktyorları Eka Çxeidze və Apollon Kublaşvili canlandırıblar.
Premyeradan əvvəl jurnalistlərə müsahibə verən yazıçı pyesi 10-12 il əvvəl yazdığını bildirib. “Pyes ilk dəfə istedadlı rejissor Mehriban Ələkbərzadə tərəfindən Azərbaycan Dövlət Akademik Milli Dram teatrında səhnəyə qoyulub. Sonradan Moskva, Sankt-Peterburq, London, İstanbul və digər şəhərlərdə səhnələşdirilib. İstedadlı həmvətənimiz, Finlandiyada yaşayan rejissor Kamran Şahmərdanın “Qatil” pyesini ekranlaşdırmaq təklifini müsbət qarşıladım. Açığını deyim ki, mən bədii əsərlərin ekranlaşdırılmasının tərəfdarı deyiləm. Çünki kinossenari orijinal olmalıdır. Lakin Kamran məni inandırdı və bu ssenarini yazdım”, - deyə ssenari müəllifi bildirib.
Filmə baxdığını söyləyən Elçin müəllim ekran əsərinin tamaşaçıların xoşuna gələcəyinə inandığını deyib: “Bu gün film ilk dəfədir geniş ictimaiyyətə təqdim edilir. Filmin Azərbaycan dilində səsləndirilməsi də vacib məsələ idi. “Azərbaycanfilm” kinostudiyası bu işin öhdəsindən bacarıqla gəlib”.
Təqdimat mərasimində çıxış edən C.Cabbarlı adına “Azərbaycanfilm” kinostudiyasının direktoru Müşfiq Hətəmov bildirib ki, hər bir premyera kino işçiləri üçün bayram olmaqla yanaşı, həm də tamaşaçılar qarşısında hesabatdır. “Azərbaycanfilm”lə ötən əsrin 70-ci illərindən başlayaraq əməkdaşlıq edən Elçin müəllimin müəllifi olduğu filmlər hər zaman böyük maraqla qarşılanıb. Onun iki il əvvəl çəkilmiş “Mahmud və Məryəm” filmi Tokiodan tutmuş Avropayadək dünya prokatlarındadır.
“Hazırda Türkiyə və Rusiya prodüserləri “Qatil” əsərini yenidən ekranlaşdırmaq üçün bizə müraciət ediblər. Eyni zamanda, görkəmli yazıçımızın digər əsərinin ekranlaşdırılması ilə bağlı bir sıra Avropa kinoşirkətlərindən təkliflər almışıq və bu məsələ yaxın vaxtlarda həllini tapacaq”, - deyə M. Hətəmov məlumat verib.
Kinostudiyanın direktoru diqqətə çatdırıb ki, “Azərbaycan kinosunun 2008-2018-ci illər üzrə inkişafına dair Dövlət Proqramı”na uyğun olaraq bu sahədə mühüm işlər görülür. Belə ki, Azərbaycanda və ölkəmizin hüdudlarından kənarda yaşayan əslən azərbaycanlı kinorejissorlar “Azərbaycanfilm”ə dəvət olunur. Son üç ildə 18-dək rejissor sınaqdan keçirilib. Onlardan biri də bu gün təqdimatı olan ekran əsərinin rejissoru Kamran Şahmərdandır. O, Finlandiyada yaşamasına baxmayaraq, “Azərbaycanfilm”lə əməkdaşlığı üstün tutur.
Baş rolun ifaçısı Eka Çxeidze və quruluşçu operatoru Mixail Maqalaşvili yaradıcı heyətin ekran əsəri üzərində şövqlə işlədiyini, filmin əsas ideyasını tamaşaçılara çatdırmaq üçün gərgin əmək sərf etdiyini bildiriblər.
Sonra film təqdim olunub.
Psixoloji dram janrında çəkilmiş “Qatil” müasir dövrümüzün aktual və ağrılı mövzularından biri olan tənha qadın probleminə həsr edilib. Ssenari müəllifi və yaradıcı heyət bunun doğurduğu fəsadları açıb göstərmək, geniş tamaşaçı auditoriyasının diqqətini bu problemə yönəltmək məqsədini qarşıya qoyub və mövzunun uğurlu ekran həllinə nail olub. Film boyu ekranda yalnız iki nəfər görünsə də, bu, tamaşaçını yormur, dərin psixoloji məqamlar onu daim gərginlikdə saxlayır və düşünməyə vadar edir.
Filmin nümayişi başa çatdıqda və salonun işıqları yandıqda hamının nəzərləri ssenari müəllifinə və yaradıcı heyətə yönəlib. Hələ də ekran əsərinin təsiri altında olan tamaşaçılar öz təəssüratlarını sürəkli alqışlarla ifadə ediblər.
İstedadlı və geniş diapazonlu yazıçı Elçinin yaradıcılığında kino xüsusi yer tutur. Onun ssenariləri əsasında çox-çox əvvəllər çəkilmiş “Baladadaşın ilk məhəbbəti”, “Arxadan vurulan zərbə”, “Gözlə məni”, “Gümüşü furqon”, “Bağ mövsümü”, “Sahilsiz gecə” və digər filmlər cazibəsini bu gün də qoruyub saxlayır. 2013-cü ildə ekranlara çıxan “Mahmud və Məryəm” filmi isə Azərbaycan kino mühitinə canlanma gətirib, yeni bir mərhələnin əsasını qoyub. Azərbaycan və Türkiyə kinematoqraflarının birgə layihəsi olan bu filmin dünya ekranlarına çıxması kinomuzun mühüm uğurudur. Əminik ki, “Qatil” filmi də geniş tamaşaçı marağına səbəb olacaq.