Dağlıq Qarabağ bölgəsinin azərbaycanlı icması “Regnum” agentliyinin baş redaktorunun ermənipərəst və qərəzli fikirlərinə münasibət bildirib

Bakı, 27 may, AZƏRTAC

Azərbaycan Respublikası Dağlıq Qarabağ bölgəsinin azərbaycanlı icması “Regnum” informasiya agentliyinin baş redaktoru Modest Kolerovun atəşkəsin 25 illiyi ilə bağlı səsləndirdiyi fikirlərinə dair bəyanat yayıb.

Bu barədə AZƏRTAC-a İcmanın mətbuat xidmətindən məlumat verilib.

Bəyanatda deyilir: “Rusiyada fəaliyyət göstərən və Azərbaycanın əleyhinə yönəlmiş qərəzli və ermənipərəst mövqeyi ilə seçilən “Regnum” informasiya agentliyinin baş redaktoru Modest Kolerovun atəşkəsin 25 illiyinə həsr edilmiş “Нагорный Карабах: право на “достойное государственное существование” başlıqlı “tezisləri” eyni adlı saytda dərc edilib.

Modest Kolerovun “tezislərini” nəzərdən keçirdikdə, bu şəxsin əvvəlcədən sərgilədiyi qərəzli mövqe və Ermənistan-Azərbaycan münaqişəsinə dair naşı münasibəti təəccüb doğurmur. Kolerov “layiqli insan mövcudluğu” tezisindən söhbət açaraq, bu abstrakt fikrini Dağlıq Qarabağ problemi ilə əlaqələndirməyə cəhd göstərir. O iddia edir ki, qondarma “dağlıq qarabağ respublikası”nın “müstəqillik hüququnun” reallaşdırılması üçün onun “layiqli dövlətçiliyinin mövcudluğu” təmin edilməlidir. Özünü informasiya agentliyinin baş redaktoru kimi təqdim edən şəxsə xatırladırıq ki, “dağlıq qarabağ respublikası” adlanan qondarma qanunsuz qurumun mövcudluğunun heç bir tarixi, hüquqi və ya digər əsasları yoxdur ki, onun “qorunması və ya təmin edilməsi” ətrafında hər hansı abstrakt müzakirələr aparıla bilsin.

“Layiqli insan mövcudluğu və dövlətçilik” ideyasından dəm vuran Kolerov Ermənistanın təcavüzkar siyasəti nəticəsində öz torpaqlarından qovulmuş və etnik təmizləməyə məruz qalmış yüz minlərlə azərbaycanlının layiqli insan kimi yaşamaq və mövcud olmaq hüquqlarını məgər görmür?! Kolerov özünü əgər bu qədər ağıllı hesab edərək “insanın ləyaqətli mövcudluğu”na qayğı ilə yanaşdığını göstərmək istəyirsə, onun məhdud çərçivədən kənara çıxaraq daha geniş düşünməsi mümkün olmazdımı?! Yersiz və populist arqumentlər irəli sürən və öz fikirlərinə “ləyaqətli yaşam” tezisləri ilə məsum “donu geyindirməyə” çalışan Kolerov əslində Ermənistanın təcavüzkar siyasətinə bəraət qazandırmağa cəhd edir. Onun bu “cəhdləri” əslində münaqişə haqqında məlumatı olmayan oxucunu aldatmağa yönəlib. Amma regionu tanıyan və Ermənistan-Azərbaycan münaqişəsi haqqında minimum məlumata malik olan şəxs üçün ermənipərəst müəllifin cəfəng fikirləri istehza doğurur.

Çox təəccüblüdür ki, “baş redaktor” olan bir şəxs beynəlxalq hüquq, ölkələrin suverenliyi, beynəlxalq tanınmış sərhədləri, ərazi bütövlüyü, beynəlxalq sülh və təhlükəsizliyin təmin edilməsi üçün beynəlxalq hüququn qəbul edilmiş norma və prinsiplərini dərk edə bilməyib. BMT Təhlükəsizlik Şurası və digər mötəbər beynəlxalq təşkilatların Ermənistan-Azərbaycan münaqişəsi haqqında qəbul etdikləri qətnamə və sənədlərini anlamayan şəxsin hansısa “ləyaqət”dən danışması gülüncdür.

Müəllifin digər məntiqsiz bir arqumenti “dağlıq qarabağ respublikasının mövcudluğu” ilə Ermənistanın taleyini müqayisə etməsi və “dqr”in olmayacağı təqdirdə, Ermənistanın məhvə düçar olacağını iddia etməsidir. Azərbaycanın işğal edilmiş torpaqlarının azad edilməsi ilə Ermənistanın taleyi arasında əlaqə axtarmaq heç bir əsası olmayan populist düşüncədən başqa heç nə deyil. Ölkəmizin işğal olunmuş torpaqlarının azad edilməsi nəinki Ermənistana təhdid yaratmaz, əksinə, bu ölkənin Azərbaycanla əməkdaşlıq imkanlarından yararlanaraq daha güclü və dayanıqlı inkişaf etməsinə səbəb olardı. Məgər bunu başa düşmək çox çətindir?! Kolerovun bu fikirləri məhz Ermənistana xələl gətirir və onun gələcək inkişafına maneə yaradır. Azərbaycanın heç kimin torpaqlarında gözü yoxdur, ölkəmiz təcavüzkar Ermənistan ordusunun işğal etdiyi ərazilərdən çıxarılmasını tələb edir.

Bəyan etmək istərdik ki, Azərbaycan Respublikasının Dağlıq Qarabağ bölgəsinin azərbaycanlı və erməni icmalarının ləyaqətli şəkildə mövcudluğu və yenidən sülh şəraitində birgə yaşayışının təmin edilməsinin yolu Azərbaycanın beynəlxalq tanınmış sərhədlərinin bərpası və işğalçı Ermənistan qüvvələrinin oradan çıxarılmasından keçir. Hər iki icmanın qeyd olunan şərtlər daxilində birgə yaşayışının yenidən təmin edilməsi ilə Modest Kolerov kimilərinin təxribatçı və manipulyativ xarakterli fikirlərinin yayılmasına imkan olmayacaq.

Biz Azərbaycanın Dağlıq Qarabağ bölgəsinin erməni icmasına bir daha səslənir və səsimizə səs verməyə çağırırıq. Zaman göstərdi ki, ötən 30 il Azərbaycanın Dağlıq Qarabağ bölgəsinin erməni icmasına problemlər, iqtisadi durğunluq, ləyaqətli insan yaşayışından məhrum olmaq və fəlakətdən başqa heç nə bəxş etmədi.

Hər iki icmanın firavan və ləyaqətli gələcəyi naminə qeyd etdiklərimizi dərk etməyin vaxtı çoxdan yetişib”.