Bakı, 25 yanvar, AZƏRTAC

Yanvarın 25-də Bakı Konqres Mərkəzində “Könüllülər Yurdu - Azərbaycan” layihəsinin bağlanış mərasimi keçirilib. Layihə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Azərbaycan Gənclər Fondu, “ASAN Könüllüləri” Təşkilatının birgə təşkilatçılığı ilə reallaşdırılıb.

AZƏRTAC xəbər verir ki, əvvəlcə “ASAN Könüllüləri” Təşkilatının sədri Səbinə Cabarova layihə haqqında məlumat verib. Təşkilatın sədri “Könüllülər Yurdu - Azərbaycan” layihəsinin məqsədinin region gəncləri arasında könüllülüyün təbliği, onların asudə vaxtlarını daha düzgün qiymətləndirmələri istiqamətində təbliğat, gənclərin fərdi və intellektual inkişafına təkan verilməsi, mövcud imkanlar barədə məlumatlandırılma, o cümlədən könüllülük hərəkatının ölkəmizdə daha geniş vüsət almasını stimullaşdırmaq olduğunu diqqətə çatdırıb.

O bildirib ki, üç ildir həyata keçirilən layihə çərçivəsində respublikanın 17 şəhər və rayonunda, ümumilikdə 51 bölgədən olan gənclər üçün könüllülüyün təbliği ilə bağlı maarifləndirmə işləri aparılıb: “Bu müddət ərzində 20 mindən çox insan könüllülük haqqında məlumatlandırılıb, 4 mindən artıq gənc isə layihənin iştirakçısı olub. Bu layihədən sonra 2500-dən çox gənc “ASAN Könüllüləri” sırasına qoşulmaq üçün müraciət edib. Statistikaya nəzər yetirsək, layihə iştirakçılarının sayının ilbəil artdığını görərik. Bu da könüllülük sahəsində görülən işlərin əbəs olmadığından və gənclərin bu fəaliyyətə marağının hər il artmasından xəbər verir. Layihə əsasən bölgələrdə həyata keçirilsə də, zərif cinsin nümayəndələrinin də fəal iştirakı bizi çox sevindirir. Belə ki, iştirakçıların 58 faizini kişi, 42 faizini isə qadınlar təşkil edir. İştirakçıların əksəriyyəti 18-25 yaş aralığında olan gənclərdir.

Ötən il layihə 15 şəhər və rayon olmaqla, ümumilikdə 45 regionu və 2500-ə yaxın gənci əhatə edib. Layihə hər bölgədə iki gün olmaqla təşkil edilib. Birinci gün müxtəlif mövzularda təlimlər, ikinci gün isə könüllülüyün əsas mahiyyətini izah edən sosial aksiyalar təşkil olunub. Təkcə son “Könüllülər Yurdu - Azərbaycan” layihəsi çərçivəsində 15 müxtəlif sosial aksiya keçirilib. Ümumilikdə isə sosial layihələrin sayı 32-yə çatıb. Bunlar əsasən ekoloji, şəxsi inkişaf, insanlara yardım, sağlamlığın təbliği və vətənpərvərlik istiqamətlərini əhatə edib. Layihə çərçivəsində əsas hədəflərimizdən biri də təkcə gəncləri könüllülük barədə məlumatlandırmaq deyil, həm onların valideynlərini, həm də yaşından asılı olmayaraq hər kəsi bu fəaliyyətin faydalılığına inandırmaq və öz sıralarımıza daha çox insanı cəlb etməkdir”.

Sonra ötən il həyata keçirilən və 30 gün davam edən “Könüllülər Yurdu - Azərbaycan” layihəsindən bəhs edən videoçarx nümayiş olunub.

Layihənin fəal iştirakçısı Urfanə Əzimova çıxış edib, layihənin faydalarından və könüllülüyün gənclərə qazandırdığı müsbət dəyərlərdən danışıb.

“Könüllülər Yurdu - Azərbaycan” layihəsinin bağlanış mərasimində çıxış edən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev layihənin nəticələrinin uğurlu olduğunu bildirib. Ölkə başçısının müvafiq Sərəncamı ilə bu ilin “Könüllülər ili” elan olunduğunu diqqətə çatdıran agentliyin sədri könüllülüyün son dövrlərdə hərəkat halına gəldiyini və Azərbaycan gəncliyinin həyat tərzinə çevrildiyini qeyd edib. Ü.Mehdiyev bildirib ki, Prezident İlham Əliyev Davos Forumunda gənclərlə bağlı sualı cavablandırarkən Azərbaycan gəncliyinin könüllülər hərəkatında, startap biznesində olduğunu deyib, gənclərin hökumət məsələlərinə fəal cəlb olunduğunu qeyd edib.

“ASAN Könüllüləri də “ASAN xidmət”lə eyni vaxtda fəaliyyətə başlayıb və qısa müddətdə öz sıralarına xeyli sayda gənci cəlb edib. Bu vaxtadək 20 mindən çox gənc “ASAN xidmət” mərkəzlərində könüllü kimi fəaliyyət göstərib. Onların 1000-dən çoxu işlə təmin olunub. Könüllülərimizin əksəriyyəti tələbələrdir. Könüllülük fəaliyyəti onlara ali təhsillərini başa vurduqdan sonra seçəcəkləri peşə istiqamətində əlavə imkanlar qazandıracaq. Hazırda “Könüllülər ili” ilə bağlı Tədbirlər Planı hazırlanır. Dövlət qurumlarının bu illə bağlı xüsusi tədbirləri olacaq. Bu da gənclərimizə təcrübə qazanmaq, yeni fürsətlər əldə etmək üçün əlavə imkanlar yaradacaq”, - deyə Ü.Mehdiyev diqqətə çatdırıb.

Agentliyin sədri “ASAN Könüllülər” Təşkilatının bu günə qədər minlərlə gənci əhatə edən tədbirlər həyata keçirdiyini qeyd edib. O, həmin tədbirlərin, xüsusilə vətənpərvərliyin təbliği istiqamətində gerçəkləşdirilən layihələrin əhəmiyyətindən bəhs edib.

Azərbaycan Gənclər Fondunun icraçı direktoru Fərid Cəfərov çıxış edərək ölkəmizdə Prezident İlham Əliyevin tapşırığına əsasən könüllülük hərəkatının genişlənməsi istiqamətində həyata keçirilən dövlət siyasətindən bəhs edib, məhz bu siyasətin tərkib hissəsi olaraq 2020-ci ilin respublikamızda “Könüllülər ili” elan olunduğunu söyləyib. O, bu tədbirin “Könüllülər ili” çərçivəsində keçirilən ilk rəsmi tədbir olduğunu qeyd edib.

F.Cəfərov təmsil etdiyi qurumun ötən il könüllülüklə bağlı keçirdiyi tədbirlər haqqında məlumat verib: “Onlar arasında gənclərin, könüllülərin təşəbbüsü ilə irəli sürülmüş və cəmiyyətdə xüsusi əks-səda yaratmış “Şəhidimiz” kampaniyasını xüsusi qeyd etmək istərdim. Bu kampaniyada könüllülər cəmiyyətdə müsbət harmoniya, həmrəylik yarada bilən bir qüvvə kimi çıxış etdilər. Bununla yanaşı, ötən ilin sonlarında “ASAN xidmət”lə birgə böyük bir layihəyə imza atdıq. Ölkəmizdə ilk dəfə olaraq “Azərbaycan könüllülük həftəsi” təşkil olundu. Bir həftə ərzində könüllülərin dəstəyi ilə 100-dən artıq layihə və tədbir ərsəyə gəldi. Bu layihənin də yekunu olaraq ölkə başçısının müvafiq Sərəncamı ilə 2020-ci il “Könüllülər ili” elan olundu. Həmin Sərəncamda “Azərbaycan könüllülük həftəsi”nin ölkəmizdə könüllülüyün yeni mərhələyə qədəm qoyduğunu və böyük potensiala malik olduğunu nümayiş etdirdiyi qeyd olunub”.

Gənclər Fondunun icraçı direktoru könüllülük fəaliyyətinin gənclərə qazandırdığı faydalardan danışıb, könüllülərə uğurlar arzulayıb.

Sonra layihənin regionlarda təşkilində fəal iştirak edən şəxslər mükafatlandırılıblar.