REGİONLAR
Laçın rayonu üzrə ötən dərs ilinin yekunları və qarşıda duran vəzifələr müzakirə edilib
Ağcabədi, 12 sentyabr, AZƏRTAC
Laçınlı məcburi köçkünlərin məskunlaşdıqları Ağcabədi rayonu ərazisindəki Taxtakörpü qəsəbəsində təhsil işçilərinin 2017-2018-ci dərs ilinin yekunları və yeni tədris ilində qarşıda duran vəzifələrə həsr olunan konfransı keçirilib.
AZƏRTAC-ın bölgə müxbiri xəbər verir ki, konfrans iştirakçıları əvvəlcə ümummilli lider Heydər Əliyevin Laçın Rayon İcra Hakimiyyətinin inzibati binasının qarşısındakı büstünü ziyarət edərək, önünə tər gül dəstələri qoyublar.
Laçın Rayon Təhsil Şöbəsinin müdiri Nicat Həsənovun məruzəsində ötən dərs ilində görülən işlər ətraflı təhlil edilib, qarşıda duran vəzifələrdən danışılıb. Bildirilib ki, 2017-2018-ci tədris ilində 80 tam orta, 25 ümumi orta məktəb, 2 məktəbdənkənar təhsil müəssisəsi fəaliyyət göstərib. 1194 sinif komplektində 11 min 998 şagirdin təlim-tərbiyəsi ilə 2746 müəllim məşğul olub. Dərs ili ərzində rayon təhsil şöbəsi təlimin keyfiyyətinin yüksəldilməsini, metodiki işin müasir tələblər səviyyəsində qurulmasını, qabaqcıl təcrübənin öyrənilməsini, istedadlı şagirdlərin aşkara çıxarılmasını, onların müsabiqə və yarışlarda, olimpiadalarda iştirakının təmin edilməsini diqqət mərkəzində saxlayıb. Ötən tədris ilində Çıraqlı kənd tam orta məktəbi üçün yeni bina tikilib. Çaylı, Qorçu, Nərmaniya kənd ümumi orta məktəbləri Tərtər rayonu ərazisində məcburi köçkünlər üçün inşa edilən yaşayış massivindəki məktəb binasının birinci korpusuna köçürülüb. Rayonun 6 nömrəli, 46 nömrəli və Çıraqlı kənd tam orta məktəblərində təmayüllü siniflər təşkil olunub.
Diqqətə çatdırılıb ki, bu il ümumtəhsil məktəblərini bitirən 939 məzundan 744 nəfəri ali məktəblərə keçirilən imtahanlarda iştirak edib, onlardan 472 nəfəri tələbə adını qazanıb. Bu, Laçın rayonu üzrə son 26 ildə ən yüksək göstəricidir. Məzunlardan 92 nəfəri 500-dən yüksək, o cümlədən 29 nəfəri 600-dən yuxarı bal toplayıb. Bundan başqa 61 məzun orta ixtisas müəssisələrinə qəbul olub.
Yeni dərs ilinə hazırlıqla əlaqədar təhsil ocaqlarında cari təmir işləri aparılıb, 116 adda 52 min 562 ədəd dərslik, 2378 ədəd müəllim vəsaiti alınaraq məktəblərə paylanıb. Müəllimə ehtiyacı olan məktəblərdə işləmək üçün 107 gənc müəllim müsabiqədən keçərək rayonun təhsil ocaqlarına göndərilib.
Tədbirdə çıxış edənlər rayon təhsilinin inkişafı istiqamətində görülən işləri, əldə olunan uğurlu nəticələri və nöqsanları geniş təhlil ediblər.
Konfransda rayon icra hakimiyyətinin başçısı Aqil Nəzərli və Təhsil Problemləri İnstitutunun şöbə müdiri Hümeyir Əhmədov çıxış edərək, ölkəmizdə təhsilin inkişafı istiqamətində görülən işlərdən, təhsil işçilərinin qarşısında duran vəzifələrdən danışıb, onlara yeni dərs ilində uğurlar arzulayıblar.
Tədbirdə qabaqcıl təhsil işçilərinə və ali məktəblərə qəbul imtahanında yüksək nəticə göstərmiş gənclərə fəxri fərman və hədiyyələr təqdim edilib.
Sonda Prezident İlham Əliyevə müraciət qəbul olunub.