“Azərbaycan-Moskva” Beynəlxalq bankı cari ilin 9 ayındakı işinə yekun vurmuşdur. Rusiyada Azərbaycan kapitallı ilk bank uğurla inkişaf edir və öz əməliyyatlarını fəal surətdə aparır.

Bankın İdarə heyətinin sədri Fuad Abdullayev AZƏRTAC-ın müxbiri ilə söhbətində demişdir ki, ilin ötən dövrü ərzində bankın infrastrukturunun yaradılması tam başa çatdırılmışdır. İndi bankda xüsusi komitələr əsasında üç kollegial idarəetmə orqanı fəaliyyət göstərir. Onlar beynəlxalq bank təcrübəsinə müvafiq surətdə formalaşdırılmışdır. Kredit komitəsi bankın müştərilərinə və tərəfdaşlarına kreditlər verilməsinə dair qərarlar çıxarır, onun kredit risklərini idarə edir. Aktivlərin və passivlərin idarə edilməsi komitəsi likvidliyin idarə olunması, bankın sərbəst vəsaitinin cəlb edilməsi və yerləşdirilməsi, onun tarif siyasəti ilə bağlı məsələlərin həlli ilə məşğuldur. 2002-ci ilin iyulunda üçüncü komitə - risklərin idarə edilməsi komitəsi də yaradılmışdır ki, onun da vəzifəsi bankın risklərinin kompleks araşdırılmasını aparmaq və bu riskləri idarə etməkdir. Bu komitə öz fəaliyyətində Rusiyanın bank təcrübəsini və beynəlxalq maliyyə təsisatlarının tövsiyələrini əsas tutur.

Fuad Abdullayev Sankt-Peterburqda filialın açılmasını bankın builki fəaliyyətində başlıca hadisələrdən biri kimi göstərdi. Onun fikrincə, bu, təkcə bankın özü üçün deyil, həm də Azərbaycanın bütün bank sistemi üçün ciddi addımdır. Bu, Azərbaycan Beynəlxalq Bankının törəmə bankının inkişafına daha bir sübutdur.

Həmin dövrdə bank özünün texnoloji inkişafına böyük diqqət yetirmiş və vəsaitinin bir hissəsini informasiya texnologiyalarına yönəltmişdir. Eyni zamanda, bank SWİFT beynəlxalq telekommunikasiya bank sisteminə qoşulmuşdur. Bu sistemə üzv olmaq ona dünyanın, əslində, hər yerində banklarla birbaşa işləmək imkanı verəcəkdir.

Bankın müştərilərlə apardığı əməliyyatlar da fəal inkişaf etmişdir. Bu il bank yeni xidmət növünü - fərdi seyflərin icarəsini tətbiq etməyə başlamışdır. İndi bu, Moskvada ən çox tələbat olan bank xidmətlərindəndir. Bank öz veksellərinin satışına da başlamışdır ki, bu da müştərilərin hesab açmadan banka pul qoymasına imkan verir.

F.Abdullayev dedi ki, bankın maliyyə göstəriciləri onun uğurla inkişaf etdiyinə sübutdur. Məsələn, cari ilin 9 ayında bankın aktivləri 550 milyon rubl olmuşdur ki, bu da ötən ilin yekun göstəricisindən 16,1 faiz çoxdur. Bankın kredit portfeli və iqtisadiyyatın real sektoruna investisiyaları 2002-ci ildəkinə nisbətən 5,5 dəfədən çox artmış və 157 milyon rubl təşkil etmişdir. Bankın səhm kapitalı 323 milyon rubl olmuşdur (xatırladaq ki, “ABB-Moskva”nın nizamnamə kapitalı 270,2 milyon rubldur). 9 ayda xalis əməliyyat gəliri 18 milyon rubla çatmışdır.

2003-cü ilin 9 ayında bankda onun müştəriləri olan hüquqi şəxslərin 331 korporativ hesabına xidmət göstərilmişdir. Bankda fiziki şəxslərin Azərbaycana və Rusiyaya pul köçürmələri sahəsində iş də uğurla aparılır. 9 ayda bank bu istiqamətdə rekord göstəricilərə nail olmuşdur: “ABB-Moskva”nın təkcə Moskva ofisi vasitəsilə, təxminən 11 milyon ABŞ dolları məbləğində köçürmə əməliyyatları aparılmış, tərəfdaş banklar şəbəkəsi vasitəsilə köçürmələr də nəzərə alınmaqla, bu məbləğ 17 milyon dollara yaxınlaşmışdır. Cari ilin təkcə üç rübü ərzində bankın köçürmələr üzrə işinin nəticələri 2002-ci ilin yekun göstəricilərindən 4 dəfə çox artmışdır.

F.Abdullayev dedi: “Beləliklə, bankın 2003-cü ilin 9 ayı ərzində işinin nəticələrini xeyli qənaətbəxş hesab etmək olar, fəaliyyət göstərdiyi 20 ayda belə uğurlu inkişafı isə onun 2004-cü ildə ciddi addımlar atmasına imkan verəcəkdir.