SİYASƏT
MÜASİR AZƏRBAYCANIN VƏ BAKI-CEYHAN XƏTTİNİN MEMARI
Türkiyənin nüfuzlu aylıq mətbu orqanlarından olan “Siyasət” jurnalının aprel nömrəsinin “İlin qonağı” rubrikasında Azərbaycan Prezidenti Heydər Əliyev haqqında “Qafqazın lideri, müasir Azərbaycanın öndəri, Türkiyənin böyük dostu” sərlövhəli geniş məqalə dərc edilmişdir. Jurnalın üz qabığında dövlətimizin başçısının rəngli fotoşəkli verilmişdir.
Məqalənin giriş hissəsində Azərbaycan Prezidenti Heydər Əliyevin indiyə qədər tutduğu bütün vəzifələrdə türklərin ve türk dünyasının hüquqlarını müdafiə etdiyi bildirilir, dövlətimizin başçının Azərbaycanın müasir və inkişaf etmiş bir ölkə olması üçün çalışan, misilsiz layihələr həyata keçirən, ölkəsinin dünya birliyində xüsusi yer tutmasına nail olan, liderliyini gördüyü işləri ilə sübut edən bir şəxsiyyət olduğu vurğulanır.
Jurnal yazır ki, ölkələrin tarixində böyük lider və öndərlərin çox mühüm rolu və təsirləri olur. Millətlərin azad və şərəflə yaşaması, dövlətlərin yaşaması və gələcəyə inamla baxması onların sayəsində mümkün olmuşdur. Bu mənada vurğulanır ki, Prezident Heydər Əliyev Azərbaycan dövləti və xalqı üçün bütün bu xüsusiyyətlərə malik olan əvəzsiz liderdir. Azərbaycanın taleyi, müstəmləkə keçmişindən sərbəst bazar iqtisadiyyatına və müstəqil gələcəyə gedən yolu böyük dövlət adamı olan Heydər Əliyevin varlığı ilə bağlıdır. Türkiyə Cümhuriyyətinin tarixini çox yaxşı bilən, Atatürkün fəaliyyətini dərindən öyrənən Heydər Əliyev demişdir: “Türkiyə Cümhuriyyəti Atatürkün yalnız fəaliyyəti nəticəsində deyil, həm də qəhrəmanlığı nəticəsində qurulmuşdur.” Məqalədə böyük dövlət adamı olmaqla yanaşı, həm də görkəmli mütəfəkkir olan Heydər Əliyevin Türkiyə və Atatürklə bağlı fikirlərinə də diqqət çəkilərək, həmin fikirlərin Azərbaycan Prezidentinin Atatürkü və Türkiyəni nə qədər sevən bir şəxs olduğunu sübut etdiyi bildirilir. Heydər Əliyevin yenidən hakimiyyətə gəlməsinin Azərbaycan ilə Türkiyə arasındakı dostluq və qardaşlıq əlaqələrinin inkişafında son dərəcə müsbət və təsirli rol oynadığı xatırladılır. Bildirilir ki, ölkələrimiz arasındakı münasibətlərin rəmzinə çevrilən Bakı-Tbilisi-Ceyhan neft kəmərinin memarı Prezident Heydər Əliyev dövlət çevrilişi və sui-qəsd cəhdlərinin, daxili və xarici təzyiqlərin baş verdiyi dövrdə müdrik siyasət və idarəetmə təcrübəsi nümayiş etdirərək, Azərbaycanın beynəlxalq aləmdə yerinin və rolunun daim yüksəklərdə qalmasına nail olmuşdur.
Daha sonra Prezident Heydər Əliyevin “Əsrin müqaviləsi”nin imzalanmasındakı xidmətlərindən bəhs olunur, onun səyləri nəticəsində Türkiyənin bu layihədəki payının 1,75 faizdən 6,75 faizə qədər artırıldığı və Xəzər neftinin Türkiyə ərazisi ilə daşınmasının qardaş ölkənin iqtisadiyyatı, coğrafi-siyasi mövqeyinin güclənməsi, ekoloji təhlükəsizliyi baxımından nə qədər böyük əhəmiyyət kəsb etməsi vurğulanır, konkret rəqəmlər gətirilir.
Müəlliflər Prezident Heydər Əliyevin Ermənistan-Azərbaycan, Dağlıq Qarabağ münaqişəsinin həlli üçün göstərdiyi səyləri və güzəştsiz mübarizəsini, tarixi İpək Yolunun bərpası layihəsini, Azərbaycanda latın əlifbasının tətbiq edilməsi üçün gördüyü işləri xatırladır, onun Atatürk sülh mükafatına, Türkiyənin Dövlət nişanına, müxtəlif universitet və qurumların fəxri mükafatlarına layiq görülməsini dövlətimizin başçısına olan hörmət və məhəbbətin parlaq nümunəsi kimi qiymətləndirirlər.
Məqalə bu sözlərlə bitir: “İllər keçəcək, yeni nəsillər gələcək, ümidvarıq ki, dünya yaxşılığa doğru gedəcək, amma Bakı-Tbilisi-Ceyhan əsas neft kəmərinin memarı olan Heydər Əliyevin türk dünyasına verdiyi töhfələri heç kim unutmayacaqdır. Bu layihənin həyata keçirilməsində böyük xidməti olan, türk xalqına qarşı dost və comərd hisslərini açıq nümayiş etdirən Heydər Əliyevi türk ictimaiyyəti hər zaman minnətdarlıq hissləri ilə yad edəcəkdir”.
Jurnalda Prezident Heydər Əliyevin qısa tərcümeyi-halı, çoxlu rəngli fotoşəkillər də verilmişdir.