Bakı, 22 fevral (AZƏRTAC). Türkiyə hökumətinin İstanbulda həyata keçirdiyi “Mərmərə” layihəsi cari ilin sonuna kimi başa çatdırılacaqdır.

AZƏRTAC “Sabah” qəzetinə istinadla xəbər verir ki, bu sözləri Türkiyənin nəqliyyat, dənizçilik və kommunikasiya naziri Binəli Yıldırım demişdir.

“Mərmərə” layihəsinə əsasən İstanbul şəhərini iki hissəyə ayıran Bosfor boğazının altından 76 kilometr uzunluğunda dəmir yolu tuneli çəkilir. Layihənin tikintisinə 2004-cü ildə başlanılmışdır və əsas işlər yerinə yetirilmişdir.

Qeyd etmək lazımdır ki, bu layihə gələcəkdə Azərbaycan, Türkiyə və Gürcüstanın Avropaya çıxış üçün birlikdə həyata keçirdikləri Bakı-Tbilisi-Qars (BTQ) dəmir yolunun davamı olacaqdır. Bunun üçün BTQ layihəsi çərçivəsində əlavə 105 kilometr uzunluğunda dəmir yolu xəttinin tikintisi də nəzərdə tutulmuşdur.