CƏMİYYƏT


Milli Məclisin təbii ehtiyatlar, energetika və ekologiya komitəsinin iclası keçirilib

Bakı, 11 mart, AZƏRTAC

Martın 11-də Milli Məclisin təbii ehtiyatlar, energetika və ekologiya komitəsinin iclası keçirilib.

AZƏRTAC xəbər verir ki, Milli Məclis sədrinin müavini, komitənin sədri Valeh Ələsgərov gündəlikdə altı məsələnin olduğunu deyib.

İclasda qanun layihələrini Ekologiya və Təbii Sərvətlər Nazirliyinin şöbə müdiri Teymur Şəkərəliyev təqdim edib. Bildirib ki, birinci oxunuşda müzakirəyə çıxarılmış məsələlərin beşi də “Ətraf mühitə təsirin qiymətləndirilməsi haqqında” ötən il qəbul olunmuş qanunun icrası məqsədilə hazırlanıb və uyğunlaşdırma xarakteri daşıyır. Həmin qanun layihəsində ölkəmizin 1999-cu ildə qoşulduğu Espo Konvensiyasının müddəaları da nəzərə alınıb.

Yeni layihələrə görə, Azərbaycan Respublikasının Su, Meşə, Torpaq, Şəhərsalma və Tikinti məcəllələrində ətraf mühitə təsirin qiymətləndirilməsi (ƏMTQ) ilə bağlı müvafiq dəyişikliklər edilir. ƏMTQ-nin əsas məqsədi qeyd olunan qanunun Əlavəsində göstərilən fəaliyyət həyata keçirilərkən ətraf mühitə və insan sağlamlığına mümkün mənfi təsirlərin aşkara çıxarılması, onların aradan qaldırılması və ya azaldılması üçün tədbirlərin görülməsidir. Bunun üçün həmin sahələrə dair strateji ekoloji qiymətləndirmə (SEQ) sənədinin hazırlanması və həmin sənədin dövlət ekoloji ekspertizasının keçirilməsi də layihələrdə əksini tapıb.

Teymur Şəkərəliyev qeyd edib ki, gündəlikdəki növbəti 4 məsələ – “Meliorasiya və irriqasiya haqqında”, “Əhalinin radiasiya təhlükəsizliyi haqqında”, “Balıqçılıq haqqında”, “Elektroenergetika haqqında” və “Nəqliyyat haqqında” Azərbaycan Respublikasının qanunlarında dəyişiklik edilməsi barədə”, “Ekoloji təhlükəsizlik haqqında”, “Su təchizatı və tullantı suları haqqında”, “Avtomobil yolları haqqında”, “Ətraf mühitə dair informasiya almaq haqqında”, “Aviasiya haqqında” və “İnformasiya əldə etmək haqqında” Azərbaycan Respublikasının qanunlarında dəyişiklik edilməsi barədə”, “İctimai iştirakçılıq haqqında”, “Dəniz limanları haqqında”, “Yaşıllıqların mühafizəsi haqqında” və “Tikinti və infrastruktur obyektləri ilə əlaqədar investisiya layihələrinin xüsusi maliyyələşmə əsasında həyata keçirilməsi haqqında” Azərbaycan Respublikasının qanunlarında dəyişiklik edilməsi barədə” və “Kənd təsərrüfatı kooperasiyası haqqında”, “Ətraf mühitə təsirin qiymətləndirilməsi haqqında”, “Turizm haqqında” və “Elektrik və istilik stansiyaları haqqında” Azərbaycan Respublikasının qanunlarında dəyişiklik edilməsi barədə” məsələlər də eyni mahiyyəti daşıyır.

Gündəlikdəki sonuncu məsələni təqdim edən T.Şəkərəliyev bildirib ki, ekoloji təhlükəsizlik haqqında qanunvericiliyin pozulduğu hallarda təqsirli olan şəxslərin məsuliyyət məsələsi İnzibati Xətalar Məcəlləsinin 275-ci maddəsinə edilən dəyişikliyə əsasən tənzimlənəcək. Həmçinin ƏMTQ və SEQ sənədlərinə qiymətləndirici tərəfindən bilə-bilə yalan rəy verilməsinə görə də cərimə tətbiq olunacaq.

Qanun layihələrinin müzakirəsi zamanı Ekologiya və Təbii Sərvətlər Nazirliyinin sektor müdiri Mübariz Əliyev, deputatlar Mirzəcan Xəlilov və Mirkazım Kazımov dəyişikliklərə münasibət bildirib, təkliflər irəli sürüblər.

Fikir mübadiləsinə komitənin sədri, vitse-spiker Valeh Ələsgərov yekun vurub.

Qanun layihələri Milli Məclisin müzakirəsinə tövsiyə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.