ELM VƏ TƏHSİL
Miqrasiya orqanlarına qulluğa qəbul olmaq istəyənlərin nəzərinə
Bakı, 13 may, AZƏRTAC
Azərbaycan Respublikası Dövlət Miqrasiya Xidməti miqrasiya orqanlarına qulluğa qəbul olmaq istəyən Azərbaycan vətəndaşları üçün müsabiqə elan edir. İyulun 31-də Dövlət İmtahan Mərkəzi (DİM) Azərbaycan Respublikasının miqrasiya orqanlarına qulluğa qəbulla əlaqədar elan edilmiş müsabiqənin test imtahanını keçirəcək.
Bu barədə AZƏRTAC-a DİM-dən məlumat verilib. Bildirilib ki, vakant vəzifələrin tələblərinə cavab verən, müsabiqənin test imtahanı mərhələsində iştirak etmək arzusu olan ali təhsilli namizədlərin qeydiyyatı mayın 16-dan iyunun 24-dək aparılacaq.
Vakant vəzifələr:
Lənkəran regional miqrasiya idarəsi - 3 yer (inspektor);
Xaçmaz regional miqrasiya idarəsi - 2 yer (inspektor);
Şəki regional miqrasiya idarəsi - 1 yer (inspektor);
Ağsu regional miqrasiya idarəsi - 3 yer (inspektor);
Yevlax regional miqrasiya idarəsi - 2 yer (inspektor);
Şirvan regional miqrasiya idarəsi - 1 yer (inspektor);
Yevlax şəhər qanunsuz miqrantların saxlanılması mərkəzi - 2 yer (inspektor).
Vakant vəzifələr haqqında məlumat, vəzifələrin tutulma şərtləri və digər məlumatlar DİM-in saytında yerləşdirilib.
Namizədlər qeyd olunan vakant vəzifələrdən biri üzrə müsabiqədə iştirak etmək üçün müraciət edə bilərlər.
Müsabiqə iki mərhələdən - test imtahanı və söhbətdən ibarətdir. Test imtahanında namizədlərə qanunvericilik sahəsi üzrə 50, Azərbaycan dili üzrə 10, Azərbaycan tarixi üzrə 10, kompüter bilikləri üzrə 10, məntiqi təfəkkürün müəyyən edilməsi üçün 20 olmaqla, cəmi 100 test tapşırığı təqdim olunacaq. Hər test tapşırığı 1 balla qiymətləndirilir. Test imtahanında 70 və daha artıq bal toplayan namizədlər ikinci mərhələyə buraxılırlar.
İmtahanda müvəffəqiyyət qazanan namizədlər barədə məlumatlar DİM tərəfindən Dövlət Miqrasiya Xidmətinə təqdim olunacaq.
Namizədlərə imtahana daha səmərəli hazırlaşmaları üçün test imtahanı proqramı ilə tanış olmaları tövsiyə edilir.
İmtahan vermək istəyən namizədin DİM-in internet saytında (http://ekabinet.dim.gov.az) “Şəxsi kabinet”i olmalıdır. Kabinet yaradılan zaman pul hesabı açılır. Namizədin imtahanda iştirak etməsi üçün ödənişin məbləği 82 manatdır (ƏDV daxil olmaqla). “Şəxsi kabinet”də olan pul hesabına vəsait daxil etmək üçün müxtəlif ödəniş üsullarından (ətraflı məlumat DİM-in saytında verilib) istifadə etmək olar.
“Şəxsi kabinet” yaradıldıqdan və hesaba lazımi vəsait daxil edildikdən sonra DİM-in internet saytında “Azərbaycan Respublikasının miqrasiya orqanlarına qəbul üzrə imtahanda iştirak etmək üçün onlayn qeydiyyat” xidməti vasitəsilə qeydiyyatdan keçmək lazımdır. Qeydiyyat zamanı namizədin ali təhsili haqqında məlumatları “Tələbə-məzun” dövlət elektron məlumat sistemi vasitəsilə yoxlanılır.
Qeydiyyatdan əvvəl namizədlər təhsil haqqında məlumatlarının “Tələbə-məzun” dövlət elektron məlumat sistemində olub-olmadığını “Elektron hökumət” portalından DİM-in “Vətəndaş haqqında “Tələbə-məzun” dövlət elektron məlumat sistemindən çıxarış” elektron xidməti vasitəsilə də öyrənə bilərlər.
Sistemdə müvafiq məlumatlar olmadıqda namizədin qeydiyyatı aparılmır. Bu halda namizəd ona aid məlumatların “Tələbə-məzun” dövlət elektron məlumat sisteminə daxil edilməsi üçün bitirdiyi təhsil müəssisəsinə müraciət etməlidir. Xaricdə təhsil almış namizədlər və sistemdə məlumatları olmayan digər namizədlər DİM-ə (Nəsimi rayonu, Akademik Həsən Əliyev küçəsi 299 və ya DİM-in regional bölmələrinə) müraciət etməlidirlər.
Qeydiyyatdan keçmiş imtahanda iştirak etməyən namizədlərin ödədiyi məbləğ geri qaytarılmır.
İmtahan, iştirakçıların sayı, mövcud sanitar-epidemioloji vəziyyət nəzərə alınaraq kağız daşıyıcılar və ya xüsusi ayrılmış zallarda kompüter vasitəsilə elektron formada aparılacaq. İmtahan kompüter vasitəsilə aparılacağı təqdirdə Bakı şəhəri üzrə DİM-in Nəsimi rayonu, Ə.Salamzadə küçəsi, 28 (keçmiş Bakı Asiya Universitetinin binası) ünvanında yerləşən binasında keçiriləcək. İmtahan kağız daşıyıcılar vasitəsilə aparılacağı təqdirdə namizəd buraxılış vərəqində göstərilən vaxtda və yerdə imtahanda iştirak etməlidir.
Aşağıda qeyd olunan kateqoriyalara aid şəxslər müsabiqənin test imtahanı mərhələsindən azad edilirlər və onlarla yalnız söhbət aparılır:
-prokurorluqda və digər dövlət orqanlarında xüsusi və ya hərbi rütbə nəzərdə tutulan vəzifələrdə işləyən şəxslər;
-digər dövlət orqanlarında inzibati vəzifə tutan dövlət qulluqçuları;
-hüquq sahəsində elmlər doktoru elmi dərəcəsi olan şəxslər.
Test imtahanından azad edilən şəxslər sənədlərini (kadrlar uçotunun şəxsi vərəqəsi, ərizə, şəxsiyyət vəsiqəsinin surəti, təhsil haqqında sənədin surəti, hərbi biletin surəti (kişilər üçün), əmək kitabçasının surəti (olduğu təqdirdə), 2 (iki) ədəd fotoşəkil (3x4 sm ölçüdə) mayın 16-dan iyunun 24-nə qədər hər gün (şənbə, bazar və bayram günləri istisna olmaqla) saat 10:00-dan 17:00-dək Dövlət Miqrasiya Xidmətinin Aparatına (Ünvan: AZ1114, Bakı şəhəri, Binəqədi rayonu, 3123-cü məhəllə, Binəqədi şosesi 202) şəxsən təqdim etməlidirlər.
Ali hüquq təhsilinə və xarici dil (yüksək səviyyədə) biliklərinə malik olan şəxslərə üstünlük verilir.
Əlaqə nömrəsi: (012) 562-53-01