SİYASƏT
Murmanskda ümummilli lider Heydər Əliyevin anadan olmasının 96-cı ildönümü qeyd edilib
Bakı, 11 may, AZƏRTAC
Qəhrəman şəhər Murmanskda Azərbaycan xalqının ümummilli lideri Heydər Əliyevin anadan olmasının 96-cı ildönümünə həsr edilmiş tədbir keçirilib.
Murmansk Vilayətindəki “Azərbaycan” Mədəniyyət Mərkəzi” İctimai Təşkilatının və Rusiyanın Azərbaycanlı Gənclər Birliyinin (RAGB) yerli nümayəndəliyinin mətbuat katibi Əlihüseyn Şükürovun AZƏRTAC-a verdiyi məlumata görə, tədbirə şəhər ictimaiyyətinin və yerli KİV-lərin nümayəndələri toplaşıblar.
Tədbirdən əvvəl iştirakçılara ümummilli lider Heydər Əliyevin anadan olmasının 96-cı ildönümünə həsr edilən videosüjet göstərilib.
Murmansk vilayətindəki “Azərbaycan” Mədəniyyət Mərkəzi” İctimai Təşkilatının sədri Hüseynəli Hüseynov tədbirdə çıxış edərək Heydər Əliyevin Azərbaycan və Rusiyanın tarixində rolundan danışıb.
H.Hüseynov qeyd edib ki, dahi şəxsiyyət Heydər Əliyev Azərbaycan dövlətçiliyi tarixində müstəsna yerə malikdir. Heydər Əliyev azərbaycançılıq ideologiyasının parlaq daşıyıcısı kimi özünün müdrik siyasəti, sarsılmaz əqidəsi və tarixi uzaqgörənliyi sayəsində milli dövlətçilik ideyalarının həyata keçməsinə, müasir Azərbaycan dövlətinin qurulmasına və xalqımızın müstəqillik arzularının təcəssümünə nail olub. H.Hüseynov, həmçinin Azərbaycan diasporunun əsaslarının Heydər Əliyev tərəfindən qoyulduğunu da qeyd edib. Bu gün dünyanın müxtəlif guşələrində yaşayan azərbaycanlıların azərbaycançılıq ideyası ətrafında birləşməsi ümummilli lider Heydər Əliyevin fəaliyyətinin nəticəsidir.
Tədbirdə çıxış edənlər Ümummilli Liderin iqtisadi və mədəni yüksəliş yoluna qədəm qoyan Azərbaycanı qısa müddətdə xarici sərmayələr üçün əlverişli ölkəyə çevirməyi bacardığını vurğulayıblar.
Ümummilli lider Heydər Əliyevin həyat və fəaliyyətini əks etdirən kitablar, albomlar, fotoşəkillər iştirakçıların diqqətinə təqdim edilib.
Tədbirin sonunda Heydər Əliyev haqqında film nümayiş etdirilib. İştirakçılara, həmçinin Azərbaycan xalqının ümummilli lideri Heydər Əliyev barədə kitab və jurnallar paylanılıb.