REGİONLAR


Muxtar respublikanın Culfa rayonunda icbari tibbi sığortanın tətbiqi uğurla davam etdirilir

Culfa, 27 yanvar, AZƏRTAC

Culfa Rayon Mərkəzi Xəstəxanasında icbari tibbi sığortanın baza zərfinə daxil olan 1525 adda tibbi xidmətdən 638-i icra ediləcək, qalanları isə digər tibb müəssisələri tərəfindən həyata keçiriləcək.

AZƏRTAC-ın Naxçıvan bürosu xəbər verir ki, bu barədə “Culfa rayonunda icbari tibbi sığortanın tətbiqi ilə bağlı tədbirlər haqqında” Naxçıvan Muxtar Respublikası Ali Məclisi Sədrinin 2020-ci il 16 yanvar tarixli Sərəncamından irəli gələn məsələlərin icrasını təmin etmək məqsədilə Culfa Rayon Mərkəzi Xəstəxanası publik hüquqi şəxsində çalışan tibb işçiləri üçün keçirilən maarifləndirici tədbirdə danışılıb.

Tədbirdə çıxış edən Naxçıvan Muxtar Respublikası Səhiyyə nazirinin müavini Samrat Gəncəyeva Culfa rayonunda icbari tibbi sığortanın tətbiqi ilə bağlı qarşıya qoyulan tapşırıqların və adıçəkilən sərəncamın icrası istiqamətində görülən işlərdən bəhs edib.

Naxçıvan Muxtar Respublikasının Nazirlər Kabineti yanında İcbari Tibbi Sığorta üzrə Dövlət Agentliyinin direktoru Samiq Sadıxov çıxışında bildirib ki, Naxçıvan Muxtar Respublikası Ali Məclisi Sədrinin müvafiq fərman və sərəncamlarına uyğun olaraq icbari tibbi sığortanın tətbiqi məqsədilə rayonlardakı mərkəzi xəstəxanalarda və icbari tibbi sığortanın tətbiqində iştirak edən digər səhiyyə müəssisələrində agentliyin qeydiyyat məntəqələri yaradılıb və fəaliyyətləri təmin edilib. Əhalinin sığortalanması prosesi həyata keçirilib və müraciət edən şəxslərlə sığorta müqaviləsi bağlanaraq onlara icbari tibbi sığorta şəhadətnaməsi verilib.

Samiq Sadıxov deyib: Ötən dövrdə əldə olunmuş uğurlu nəticələrə əsasən icbari tibbi sığortanın əhatə dairəsi genişləndirilərək Culfa rayonunda da tətbiq edilməsi üçün verilən tapşırıqların icrasını təmin etmək məqsədilə lazımi hazırlıq işləri həyata keçirilib. Belə ki, xəstəxanada yenidənqurma və təmir-bərpa işləri görülüb, müvafiq palatalarda mərkəzi oksigen sistemi qurulub, fiber-optik xətlər vasitəsilə internet şəbəkəsi, mərkəzi server qurularaq “Medisoft” Səhiyyə informasiya idarəetmə sistemi yaradılıb. Hazırda xəstələrin qeydiyyatı həmin sistem vasitəsilə aparılır. Xəstəxananın Təcili tibbi yardım şöbəsi yenidən təşkil edilib, göstərilən tibbi xidmətin keyfiyyətini yüksəltmək məqsədilə ən müasir tibbi cihaz və avadanlıqlar alınaraq quraşdırılıb.

Culfa rayonunun icbari tibbi sığortanın tətbiqinə tam hazır olması və çatışmazlıqların yerində həll edilməsi məqsədilə keçirilmiş təlim və seminarlarda tibb işçilərinə Səhiyyə informasiya idarəetmə sistemi, göstəriləcək tibbi xidmətlər, tibbi xidmətlərə dair aylıq hesabatların tərtib olunma qaydaları izah edilib, nümunəvi hesabat formaları təqdim olunub və tibb işçilərini maraqlandıran suallar cavablandırılıb.

Sonra çıxışlar dinlənilib, suallar cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.