REGİONLAR
NDU ilə Türkiyənin Ərzurum Atatürk və Van Yüzüncü il universitetləri arasında müqavilə imzalanıb
Naxçıvan, 11 may, AZƏRTAC
Ərzurum Atatürk Universitetinin rektoru, professor Ömər Çomaklı, beynəlxalq əlaqələr ofis koordinator köməkçisi, professor Ali Çağlar Güllücə, Van Yüzüncü il Universitetinin rektoru, professor Hamdullah Şevli və universitetin prorektoru Sabahattin Şevgin Naxçıvan Dövlət Universitetində olublar.
Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, qonaqlar əvvəlcə ümummilli lider Heydər Əliyevin Naxçıvan şəhərinin baş meydanında ucalan abidəsini ziyarət edib, Ulu Öndərin heykəlinin önünə gül dəstələri qoyub, hörmət və ehtiramlarını ifadə ediblər. Rektorlar Heydər Əliyev Muzeyi ilə də tanış olublar.
Naxçıvan Dövlət Universitetinin rektoru Elbrus İsayev qardaş ölkənin rektorları ilə görüşündə, onları universitetdə görməkdən məmnunluğunu ifadə edib. Rektor rəhbərlik etdiyi ali təhsil ocağının əməkdaşlıq əlaqələrində hər iki universitetin xüsusi rolu olduğunu vurğulayıb. Bildirib ki, bu tarixi ənənənə Ərzurum Atatürk Universiteti ilə 1992-ci ildən, Van Yüzüncü il Universiteti ilə 1998-ci ildən başlanıb. Ümumiyyətlə, Naxçıvan Dövlət Universiteti ilə Türkiyənin 130-dan artıq ali təhsil ocağı arasında beynəlxalq əməkdaşlıq müqavilələri imzalanıb.
Universitetin 55 illik tarixi inkişaf yolu, maddi-texniki bazası, müasir tədris üsulları haqqında məlumat verən Elbrus İsayev ali təhsil ocağında Tibb təhsilindən, rezidentura üzrə kadr hazırlığı istiqamətlərindən, fakültənin bazasında ayrıca xəstəxananın mövcudluğundan danışıb. Qeyd edilib ki, ali təhsil ocağı elmi tədqiqat istiqamətli araşdırmalara üstünlük verməklə gələcək hədəflərini müəyyənləşdirir.
Türkiyənin Ərzurum Atatürk Universitetinin rektoru, professor Ömər Çomaklı yüksək qonaqpərvərlikdən məmnun olduğunu bildirib. Qeyd edilib ki, Türkiyənin ən qədim yeddi universitetindən biri olan Atatürk Universiteti xəstəxanası olan və Şərqi Anadolu və Şərqi Qara dəniz üçün önəmli sağlıq mərkəzi rolunu oynayan ali təhsil müəssisəsidir. Vurğulanıb ki, bu gün ali təhsil ocağı Türkiyənin ən önəmli 20 araşdırma universitetləri sırasında yer alır.
Görüşdə Ərzurum Atatürk Universiteti ilə kənd təsərrüfatı biotexnologiyası, beynəlxalq ticarət və logistika, Erasmus+, Mövlana proqramalarının, birgə elmi konfransların təşkili, ortaq doktorantura proqramları, rezidentlərin təcrübə proqramlarına cəlbi və digər məsələlər müzakirə olunub.
Van Yüzüncü il Universitetinin rektoru, professor Hamdullah Şevli ilk dəfədir səfər etdiyi universitet haqqında yüksək təəssüratlarından danışıb. Rektor bildirib ki, Van Yüzinci il Universitetinin bu il 40-cı ildönümü qeyd olunur. Professor mövcud ixtisaslar və universitetin gələcək perspektiv imkanları barədə məlumat verib. Van Yüzüncü il Universiteti ilə görüşdə beynəlxalq akkreditasiya qaydaları, müəllim və tələbə mübadiləsi, meliorasiya və turizm sahəsində təcrübə əldə etmək, elmi araşdırmalar, qida mühəndisliyi, zootexnik sahəsi üzrə araşdırma mərkəzlərinin birgə fəaliyyətinə dair müzakirələr aparılıb.
Tədbirdə bu ilin yayında Naxçıvan Dövlət Universitetində keçirilməsi nəzərdə tutulan Beynəlxalq tibb forumunda hər iki universitetin iştirakı barədə razılığa gəlinib.
Naxçıvan Dövlət Universiteti ilə hər iki universitet arasında protokol aktı imzalandıqdan sonra rektorlar qarşılıqlı hədiyyələr təqdim ediblər.
Sonra qardaş ölkənin rektorları ali təhsil ocağının universitetdə konsert proqramını izləyiblər.
Qonaqlar Əshabi-Kəhf ziyarətgahı, Naxçıvanqala, Möminə xatun məqbərəsi, Xan sarayı, Nuhun türbəsi ilə də tanış olublar. Türkiyəli rektorlar səfər çərçivəsində Naxçıvan Qarnizonu Mərkəzi Hospitalına gəlib, Naxçıvan Dövlət Universitetində Hərbi tibb ixtisasında təhsil alan tələbələrin burada təcrübə keçmələri barədə məlumatlandırılıblar.