Stokholm, 8 aprel, AZƏRTAC

Ötən il İsveçin sərhəd məntəqələrində dəyəri 100 milyonlarla kron olan yarım ton kokain aşkar edilib.

AZƏRTAC İsveçin SVT qəzetinə istinadla xəbər verir ki, polis əməkdaşlarının sözlərinə görə, narkotik maddələrin qeyri-leqal daşınması marşrutu ölkənin Eresunn körpüsündən keçir. Lakin qanun keşikçiləri xəbərdar edirlər ki, cinayətkar şəbəkələr meyvə ticarəti ilə məşğul olanların imkanlarından da istifadə edirlər.

Şimali Avropa ölkələrinə göndərilən meyvə və tərəvəzin 90 faizə yaxını limanlardan keçir. Bu məhsullarla yüklənmiş konteynerlər Cənubi Amerikadan Avropanın şimal regionlarına göndərilir və qaçaqmalçılar bu marşrutdan istifadə edərək, konteyner sahibinin də xəbəri olmadan, onlara narkotik maddələr yerləşdirirlər. Cinayətkarlar bu əməllərində dünyanın bütün limanlarında olan korrupsiyalaşmış əməkdaşlardan istifadə edirlər.

İsveçin cənubundakı polis kəşfiyyatının başçısı Patrik Anderssonun sözlərinə görə, məhz bu əməkdaşlar cinayətkar şəbəkələrin əvvəlcədən məlumatlandırılmasında iştirak ediblər. Anderssonun rəhbərlik etdiyi qrup həmin şəbəkələrin yerlərinin üzə çıxarılması ilə məşğul olur. Polis kəşfiyyatının rəisi hesab edir ki, kriminal şəbəkələr yerli meyvə tacirlərinin topdansatış anbarlarına da daxil olub, həmçinin Helsinqborq limanında qaçaqmalçılıq logistikasının hazırlanması ilə məşğul olublar.

Avropa İttifaqı polis xidməti olan Europol yaranmış vəziyyəti narkotik maddə qaçaqmalçılığı ilə mübarizədə əsas problem adlandırıb. 2010-cu ildə İsveçdə kriminal şəbəkə ilə əlaqədə ittiham olunan iki nəfər 10 il müddətinə azadlıqdan məhrum edilib. Onlar Helsinqborq limanı vasitəsilə 106 kq kokain keçirməyə çalışıblar, lakin polis və gömrük əməkdaşları bunu vaxtında aşkar edə biliblər. Ağır cəzalara baxmayaraq, cinayətkar ünsürlə əməllərindən əl çəkmirlər.

Qeyd edək ki, son illər İsveç Gömrük Administrasiyası daha çox miqdarda kokain müsadirə edir. Təkcə 2018-ci ildə onlar tərəfindən yarım ton narkotik maddə aşkar edilib.

Rauf Əliyev

AZƏRTAC-ın xüsusi müxbiri

Stokholm