Naxçıvan, 25 yanvar, AZƏRTAC

Ötən il Naxçıvan Kikboksinq Federasiyasının idmançılarının ölkə və dünya səviyyəli yarışlarda iştirakı təmin edilib, federasiya idmançıları respublika miqyaslı birinciliklərdə 21, dünya çempionatlarında 9 medal olmaqla, ümumilikdə, 30 müxtəlif əyarlı medal qazanıblar.

Naxçıvan Muxtar Respublikası Gənclər və İdman Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, bu faktlar Naxçıvan Kikboksinq Federasiyasında ötən ilin yekunları və qarşıda duran vəzifələrin müzakirəsi zamanı qeyd edilib.

Federasiyanın sədri Xəyal Abdullayev idmançıların təkcə kikboksinqdə deyil, digər döyüş idmanı növləri - universal döyüş, pankration, qrepplinq, MMA, uşu, hətta boks və güləş üzrə açıq birinciliklərdə iştirakına zəmin yaradıldığını və bununla da effektiv nəticələrin əldə olunduğunu diqqətə çatdırıb. Qeyd olunub ki, federasiya idmançıları arasında ölkə, beynəlxalq və dünya səviyyəli yarışların qalib və mükafatçıları var və bu amil gələcəyə nikbin baxmağa əsas verir. Qazanılan fərdi uğurlarla yanaşı, müasir fəaliyyət mexanizminə nail olmaq üçün xaricdə fəaliyyət göstərən idman təşkilatları ilə əməkdaşlıq əlaqələri qurulur, onların təşkilatçılıq təcrübəsinin muxtar respublikada tətbiqi və idmançılarımızın peşəkar arenalarda iştirakı ilə bağlı işlər görülür. Qazanılan uğurlara baxmayaraq, kollektiv bundan sonra da əzmlə çalışacaq, göstərilən dəstək və etimadı layiqincə dəyərləndirəcək. Xəyal Abdullayev yaradılan şəraitə görə Ali Məclisin Sədrinə minnətdarlığını bildirib.

Gənclər və idman naziri Ramil Hacı vurğulayıb ki, Ali Məclis Sədrinin rəhbərliyi altında muxtar respublikada idman və idmançılara ən yüksək səviyyədə dövlət qayğısı göstərilir. Göstərilən qayğıya əməli işlə cavab vermək üçün nazirlik muxtar respublikanın bütün idman federasiyaları ilə qarşılıqlı fəaliyyət göstərir, idmanın inkişafı və təbliği istiqamətində ardıcıl addımlar atılır.

Qeyd olunub ki, 2021-ci ildə nazirlik tərəfindən bədən tərbiyəsi və idman sahəsi üzrə 189 tədbir keçirilib. Ötən il muxtar respublika idmançıları üçün yaddaqalan və əlamətdar olub. Belə ki, ölkə və dünya səviyyəli yarışlarda qazanılan 27 qızıl, 32 gümüş və 23 bürünc medal əyarına görə Naxçıvan idmanı tarixində ən yüksək göstəricidir.

Federasiyanın fəaliyyəti haqqında danışan nazir deyib ki, 2018-ci ildə yaradılan Kikboksinq Federasiyası ötən ildə öz işini verilmiş tapşırıqlara əsasən qurub. Muxtar respublikada uğurla icra olunan dövlət idman siyasəti nəticəsində yaranan davamlı inkişaf tempi, qazanılan uğur və nailiyyətlərə baxmayaraq, qarşımızda mühüm vəzifələr dayanır. İdman federasiyaları və aidiyyəti qurumlarla birgə “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın icrası istiqamətində işlərin davam etdirilməli olduğunu vurğulayan Ramil Hacı dövlət idman siyasəti çərçivəsində qarşıya qoyulan tələb və tapşırıqları diqqətə çatdırıb. Nazir çıxışının sonunda qarşılıqlı əməkdaşlıq və fəaliyyət nəticəsində yeni nailiyyətlərin əldə olunacağına inamını ifadə edib.

Federasiya nümayəndəsi Ramal Yaqubov ötən il keçirilən tədbirlər haqqında hesabat xarakterli məlumatı diqqətə çatdırıb, gündəlikdə duran məsələlərlə bağlı hazırlanan qərar layihəsi təsdiq olunub. İclasda məşqçilərin fikir və təklifləri dinlənilib, bölmələrin fəaliyyəti, mövcud çatışmazlıqlar və gələcək istiqamətlər müzakirə olunub, aidiyyəti üzrə tapşırıqlar verilib.

Ötən il uğurlu nəticələr əldə edən idmançılar Sadiq Kərimov, Röya Abdullayeva, Fərid Məhərrəmov, Rəhim Əşrəfov, Miryusif Seyidbəyli və Əli Nəsrullayev diplom və hədiyyələrlə mükafatlandırılıblar.