İQTİSADİYYAT


Pərviz Şahbazov: “Cənub Qaz Dəhlizi” ilə Azərbaycan qazı yeni mənbə kimi Avropa bazarına daxil olacaq

Bakı, 25 noyabr, AZƏRTAC

Azərbaycanın energetika naziri Pərviz Şahbazov noyabrın 24-də Boliviyanın Santa Cruz şəhərində keçirilən Qaz İxrac edən Ölkələr Forumuna (Gas Exporting Countries Forum – GECF) üzv ölkələrin dövlət və hökumət başçılarının IV Zirvə Toplantısında iştirak edib.

Energetika Nazirliyinin mətbuat xidmətindən AZƏRTAC-a bildirilib ki, toplantıda təbii qaz ehtiyatlarının suverenliyinin təşviqi, qaz bazarında sabitliyin təmin olunmasına töhfə verilməsi, üzv ölkələr arasında texnologiya mübadiləsinin yaxşılaşdırılması, forumun təbii qaz sektorunda etibarlı və lider qurum kimi mövqeyinin möhkəmləndirilməsi kimi məsələlər müzakirə olunub.

Sammitdə çıxış edən Pərviz Şahbazov Azərbaycanın 2001-ci ildən etibarən forumun işini diqqətdə saxladığını və 2015-ci ildə isə müşahidəçi statusu aldığını deyib. Bildirib ki, GECF enerji sahəsində qlobal çağırışların müzakirəsi, beynəlxalq qaz bazarının tənzimlənməsi, qaz istehsalı və tədarükü sahəsində yeni texnologiyaların tətbiqi üzrə təcrübə mübadiləsi və tərəfdaşlar ilə dialoq üçün effektiv bir platformadır.

Karbohidrogen ehtiyatlarının quruda və dənizdə ilk dəfə olaraq Azərbaycanda çıxarıldığını vurğulayan nazir deyib ki, müstəqillik qazandıqdan sonra ölkəmiz regional və qlobal səviyyədə strateji enerji layihələrinin təşəbbüskarı olub. Bakı-Tbilisi-Ceyhan və Bakı-Supsa neft kəmərlərinin, eləcə də Bakı-Tbilisi-Ərzurum qaz kəmərinin tikintisi və fəaliyyəti Azərbaycanı qlobal enerji təhlükəsizliyinə töhfə verən etibarlı tərəfdaşa çevirib. Transmilli enerji layihələrindən olan “Cənub Qaz Dəhlizi”nin reallaşdırılması ilə Azərbaycan qazı yeni mənbə kimi Avropa bazarına daxil olaraq, qitənin enerji təhlükəsizliyinin təminatında mühüm rol oynayacaq.

Forum çərçivəsində energetika naziri Pərviz Şahbazov ilə Boliviyanın energetika naziri Luis Alberto Sançes, eləcə də tədbirdə iştirak edən digər ölkələrin nümayəndə heyətlərinin rəhbərləri arasında ikitərəfli görüşlər keçirilib. Görüşlərdə energetika sektorunda əməkdaşlıq imkanları müzakirə olunub.

Xatırladaq ki, Qaz İxrac edən Ölkələrin Forumunun 12 əsas - Əlcəzair, Boliviya, Misir, Ekvatorial Qvineya, İran, Liviya, Nigeriya, Qətər, Rusiya, Trinidad və Tobaqo, Venesuela və Birləşmiş Ərəb Əmirlikləri və 7 müşahidəçi - Azərbaycan, Qazaxıstan, Niderland, Norveç, İraq, Oman və Peru üzvü var.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.