Qazaxıstanın Baş naziri Danial Əhmədov ”QazMunayQaz” milli neft şirkətinin rəhbərləri ilə Xəzər şelfindəki neft yataqlarının işlənilməsi proqramının həyata keçirilməsinin gedişini müzakirə etmişdir. Qazaxıstan hökumətinin sədri vurğulamışdır ki, bu proqramın qəbul edilməsi ölkənin mütəxəssisləri qarşısında yeni vəzifələr qoymuşdur.

Şirkətin prezidenti Uzakbay Karabalin “Tengiz”, “Qaraçanaq” yataqlarında və Xəzərin şimalındakı yataqlarda vəziyyət və hökumət yardımı tələb olunan sahələr barədə məlumat vermişdir.

Görüşdə bildirilmişdir ki, Xəzər şelfindəki neft yataqlarının istismara verilməsi buradan ildə 120-160 milyon ton “qara qızıl” ixrac etməyə imkan yaradacaqdır. Buna görə də “QazMunayQaz” magistral neft kəmərlərini modernləşdirməyi və yeni Jetıbay-Kurık boru kəməri çəkməyi nəzərdə tutur.