REGİONLAR
Regionlarda çalışan sahibkarlar vergi qanunvericiliyindəki dəyişikliklər barədə məlumatlandırılır
Quba, 16 yanvar, Elxan Yusifli, AZƏRTAC
Vergilər Nazirliyinin nümayəndələri regionlarda çalışan sahibkarlarla görüşlərə başlayıb. Görüşlərin keçirilməsində məqsəd 2017-ci ilin yanvar ayının 1-dən qüvvəyə minən “Vergi Məcəlləsində dəyişikliklər edilməsi haqqında” və “Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında” qanunların şərh edilməsi, vergi qanunvericiliyində baş vermiş dəyişikliklərin regionlarda çalışan sahibkarlara və iş adamlarına bilavasitə çatdırılmasıdır.
AZƏRTAC xəbər verir ki, ilk belə görüş yanvarın 16-da Quba şəhərində, 3 saylı Ərazi Vergilər İdarəsinin əhatə dairəsinə düşən Xaçmaz, Quba, Qusar və Şabran rayonlarında fəaliyyət göstərən sahibkarlarla olub.
Görüşdə vergilər nazirinin müavini Sahib Ələkbərov çıxış edərək, bu il Vergi Məcəlləsinə həm həcm, həm də mahiyyət baxımından olduqca ciddi dəyişikliklərin edildiyini bildirib. Qeyd olunub ki, bu dəyişikliklərin əsas məqsədi sahibkarlığın, xüsusilə də kiçik və orta biznesin inkişafına daha əlverişli şəraitin yaradılması, vergi yükünün azaldılması, sahibkarların hüquqlarının daha etibarlı qorunması, vergi orqanları və sahibkarlıq subyektləri arasında qarşılıqlı etimadın səviyyəsinin yüksəldilməsi, nağdsız əməliyyatların həcminin artırılması, vergi mühitinin cəlbediciliyinin artırılması yolu ilə iqtisadiyyata investisiya qoyuluşlarının təşviq edilməsi, dürüst və şəffaf uçotun qurulmasıdır.
Nazir müavini vergi tutulan əməliyyatların həcmi 200.000 manatdan artıq olan ticarət və ictimai iaşə fəaliyyəti ilə məşğul olan şəxslərdən 2017-ci aprelin 1-dən, bütün digər vergi ödəyicilərindən isə 2018-ci yanvarın 1-dən malların, işlərin və xidmətlərin alıcısı olan hüquqi şəxslərə və fərdi sahibkarlara elektron qaimə-faktura təqdim edilməsi ilə bağlı Məcəlləyə yeni maddə əlavə olunduğunu bildirib. Vurğulanıb ki, bu dəyişiklik sahibkarlar arasında aparılan əməliyyatların rəsmiləşməsi prosedurunun sadələşməsinə, operativliyin təmin edilməsinə, inzibatçılıq xərclərinin azaldılmasına, sahibkarların xərclərini təsdiq edən sənədlərə malik olmaqla, gələcəkdə vergi orqanları ilə fikir ayrılıqlarının qarşısının alınmasına və şəffaflığın təmininə xidmət edəcək.
S.Ələkbərov dövlətimizin başçısının təşəbbüsü ilə qəbul olunmuş “Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında” Qanunun əhəmiyyətinə toxunaraq bildirib ki, bu qanun sahibkarların maliyyə vəziyyətinin sağlamlaşdırılmasına, onların sərəncamında əlavə vəsaitlərin qalmasına, sahibkarlığın inkişafının stimullaşdırılmasına və daha əlverişli biznes mühitinin formalaşdırılmasına xidmət edir. Nazir müavini yaranmış borclar üzrə hesablanmış faizlərin və Vergi Məcəlləsinin 58.7-ci maddəsinə əsasən hesablanmış maliyyə sanksiyalarının tam silinəcəyini, digər maliyyə sanksiyaları üzrə isə müəyyən edilmiş şərtlər daxilində silinmələrin nəzərdə tutulduğunu bildirib, sahibkarları bu qanunun yaratdığı imkanlardan maksimum yararlanmağa çağırıb.
Görüşdə çıxış edən Vergilər Nazirliyinin rəhbər vəzifəli şəxsləri Vergi Məcəlləsində edilmiş əlavə və dəyişikliklərin ətraflı izahını verib, dəyişikliklərin mahiyyəti və qanunun tətbiqi ilə bağlı məsələlər barədə vergi ödəyicilərini məlumatlandırıblar.
Sahibkarlar çıxış edərək onlara göstərilən diqqət və qayğıya görə dövlətimizin başçısına minnətdarlıqlarını bildiriblər.
Sonda tədbirdə iştirak edən vergi ödəyicilərinin sualları cavablandırılıb.