REGİONLAR


“Şahbuz” komandası paralimpiyaçılar arasında keçirilən futzal üzrə muxtar respublika turnirinin qalibi olub

Naxçıvan, 9 may, AZƏRTAC

Ümummilli lider Heydər Əliyevin anadan olmasının 96-cı ildönümünə həsr edilmiş “Heydər Əliyev kuboku” uğrunda paralimpiyaçılar arasında keçirilən futzal üzrə Naxçıvan Muxtar Respublika turnirinin qalibi müəyyənləşib.

AZƏRTAC-ın Naxçıvan bürosu xəbər verir ki, Naxçıvan Muxtar Respublikası Gənclər və İdman Nazirliyi ilə Paralimpiya Federasiyasının birgə təşkil etdiyi birincilikdə 8 komanda olimpiya sistemi üzrə mübarizə aparıb.

Naxçıvan şəhərindəki İlham Əliyev adına Olimpiya İdman Kompleksində keçirilən açılış mərasimində çıxış edən Naxçıvan Muxtar Respublikası Paralimpiya Federasiyasının sədri Nicat Babayev bildirib ki, məhdud fiziki imkanlı uşaqların idman qruplarına cəlbi və onların cəmiyyətə inteqrasiyası məqsədilə muxtar respublikada yaradılan hərtərəfli şərait, göstərilən qayğı paralimpiyaçılarımızın respublika səviyyəli yarışlarda uğurla çıxış etmələrinə imkanlar açıb.

Vurğulanıb ki, məhdud fiziki imkanlı insanlara tibbi və sosial reabilitasiya xidmətləri göstərilir, sağlamlıq imkanları məhdud olan şəxslərin idmana cəlbi yönündə işlər görülür.

Naxçıvan Muxtar Respublikasının Gənclər və idman naziri Azad Cabbarov çıxışında qeyd edib ki, muxtar respublikada bütün sahələrdə olduğu kimi, idman sahəsində də mühüm işlər görülür. Göstərilən hərtərəfli dövlət qayğısı nəticəsində gənclərin idmanın müxtəlif növlərinə marağı gündən-günə artır. Bu gün Naxçıvanda fiziki imkanları məhdud insаnlаrın cəmiyyətə intеqrаsiyаsı üçün də ardıcıl və məqsədyönlü tədbirlər həyаtа kеçirilir. Onlar arasında idmаnın kütləviliyinə nail olunmasına çalışılır, asudə vaxtlarının səmərəli təşkili istiqamətində davamlı tədbirlər görülür.

Turnirin final görüşündə “Naxçıvan” komandasını 7:2 hesabı ilə məğlub edən “Şahbuz” komandası birinciliyin qalibi olub. “Sədərək” komandası isə üçüncülüklə kifayətlənib.

Sonda qalib komandalar diplom və hədiyyələrlə mükafatlandırılıblar. “Şahbuz” komandasına isə turnirin kuboku təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.